PM Taur Fó Justifikasaun ba PN Kona-ba Implementasaun EE Da-IV
Naunil Media (Díli), Tersa (11/08) ne’e, Primeiru Ministru (PM), Taur Matan Ruak ho nia membru sira Governu marka prezensa iha plenária Parlamentu Nasionál (PN) hodi fó justifikasaun ba deputadu sira kona-ba extensaun Estadu Emerjénsia (EE) ba da-haat (IV) mak dekreta ona husi Prezidente Repúblika (PR) Francisco Guterres ‘Lú Olo’.
Xefe Governu konstitusionál da-ualu, Taur Matan Ruak, esplika rezaun pedidu Governu nian ba deklarasaun Estadu Emerjénsia relasiona ho Surtu COVID-19 iha Timor-Leste (TL), tanba haree ba dadaun ne’e iha nasaun viziña Indonézia ho númeru kazu COVID-19 sa’e maka’as.
“Deklarasaun Estadu Emerjénsia ne’e ho razaun COVID-19 iha nasaun viziñu sira ho númeru aumenta ba bebeik. Iha Indonézia ultrapasa 127.000, Australia 21.000 no nível global besik millaun 20, no rihun rihun 700 resin mate. Razaun seluk mak risku ba kontajiu ne’e bo’ot liu no pior liu, kuandu ita iha inseguransa jurídika”, Eis-gerileiru rejistensia no atual xefe órgaun exzekutivu, Taur Matan Ruak, akresenta asuntu ne’e liu husi nia intervensaun iha plenaria Uma Fukun.
Primeiru Ministru Taur Matan Ruak, hateten tanba Governu hareelaiha seguransa saúde bainhira Estadu Emerjénsia, tanba entidade balun la kompri regra prevensaun COVID-19.
“Embaixada sira invoka konvensaun Vienna no sira lakompri regra ne’ebe ita impoen. Se embaixada sira hanesan ne’e, oinsa mak ita atu kontrola. Nune’e haree ba inseguransa, dala ida mak ita avansa deklarasaun estadu emerjénsia”, tenik Eis-Prezidente Repúblika ne’e.
Tuir eis-gerileiru rejistensia ne’e, governu hanoin katak iha nesesidade ba extensaun Estadu Emerjénsia, tanba kazuCOVID-19 dahuluk ne’ebe hanesan kazu importadu mosu iha rai-laran.
Hafoin deskusaun klean ho Xefe Estadu Timor-Leste, Lú Olo no hetan konsella haree katak iha duni nesesidade ba deklarasaun Estadu Emerjénsia ba da-IV.
“Hein katak konfirma Estadu Emerjénsia ne’ebe la’o dadaun, Governu bele halo esforsu tomak atu implementa tuir mandate ne’ebe iha ona”, dehan PM Taur.
PR Francisco Guterres ‘Lú Olo’ dekreta ona Estadu Emerjénsia ba da-IV ligadu ho prevensaun Surtu COVID-19, no hahu tama iha vigor husi loron 06 fulan Agostu ne’e to’o remata iha loron 04 fulan Setembru tinan 2020. Lop
