KSDS Diskuti Proposta Kona-bá Nomeia no Ezonera iha Forsa -Armada

Naunil Media (Díli), Reuniaun Konsellu Superior Defeza no Seguransa (KSDS) hodi diskuti no rona opiniaun membru sira kona-ba proposta governu nian ne’ebé trata ezonerasaun no nomeasaun ba Komandante Komponente iha Forsa Armada.

“Ohin reuniaun Konsellu Superior Defeza no Seguransa atu diskuti proposta mai husi guvernu ne’ebé trata kona-bá ezonerasaun no nomeasaun Komandante Komponente Forsa Armada sira nian,” dehan Xefe Kaza Militár Koronel António da Silva Soares ” Maukalu” ba jornalista sira hafoin reuniaun KSDS ne’ebé hala’o iha Palásiu Prezidensiál Nicolau Lobato Bairru Pite,Tersa (22/02).

Koronel António Soares hatutan,  Tuir lei kona-ba nomeasaun ba Komandante Komponente sira ne’e fó kompetensia ba Prezidente Repúblika atu bele Ezonera no nomeia, tanba ne’e mak uluk forsa armadas nia estatutu organiku sira iha komponente lima (5) mak hanesan komponente Terestre, Formasaun no Treinu, Konpaña Apoiu Servicu, Aero no Naval.

Maukalu hateten,  Ikus mai ho estatutu foun mak hela de’it komponente tolu (3) mak hanesan Terestre, Naval no Aero komponente sira seluk sai fali unidade apoiu ne’ebé komponente tolu ne’e mak presiza tenke nomeia.

Xefe Kaza Militár ne’e esplika,  Sira ne’ebé uluk husi komponente lima ne’e nia mandatu hotu ona Ezonera tiha sira,  agora ne’e tolu de’it entaun kompetensia Prezidente Repúblika so nomeia de’it ba iha komponente tolu ne’e.

Nia dehan, Iha reuniaun Konsellu Superior Defeza Seguransa kona-ba proposta ne’ebé mai husi governu ne’e hotu-hotu,  fó hanoin pozitivu ba proposta ne’ebé guvernu aprezenta mai ne’e, depois Prezidente Repúblika dekreta tiha ba tomada de posse nian ne’e depois mak bele delega ba iha komandu F-FDTL para depois realiza posse iha sira nia unidade.

Ba komponente Terestre dadaun ne’e nomeia fali Koronel José da Costa Trix ne’ebé antes ne’e komanda husi Tenente Koronel Renilde, Komandante Komponente Naval dadaun ne’e nomeia Komodoru Igino das Neves, no mós ba Komandante Komponente Aero mak nomeia Tenente Koronel Helder da Costa, nia haktuir.

Iha reuniaun KSDS ne’e Prezidente Repúblika Francisco Guterres “Lú Olo” konsulta membru konsellu kona-ba ezonerasaun no nomeasaun para sira  bele fo hanoin iha ninia konselleru sira no verifika kona-ba prosedimentu oinsá sira aprezenta proposta.

Tanba tuir nomeasaun komponente nian ne’e tuir lei hateten katak bainhira atu aprezenta karik proposta ne’e tenke husi komandu F-FDTL, no depois aprezenta ba Ministeriu Defeza no kuandu to’o iha Ministru Defeza hakarak ka lakohi tenke konsulta ba konsellu Superior Defeza no Militár, pronunsia fó tiha sira nia hanoin mak foin Ministru Defeza aprova hodi lori ba konsellu Ministru no KM delibera hodi haruka ba Xefe estadu, nia hakotu. *Jos