Lere : Governu Tenki Kria Regra Regurozu ba Arte Marsiál
Naunil Media (Díli), Xefe Estadu Maiór Jeneral FALINTIL-FDTL, Majór Jeneral Lere Anan Timur, husu Governu tenki kria regra rigorozu ba grupu Arte Marsiál sira ne’ebe mak ba Fronteira tama ba area Indonézia nian hodi sa’e sintu (sabuk).
Xefe Estadu Maiór Jenerál FALINTIL-FDTL, Majór Jeneral Lere Anan Timur, ba jornalistas sira hafoin partisipa seremonia graduasaun membru foun Unidade Polísia Militár (PM), iha edifisiu PM, Kintal Bo’ot, Kinta (17/09).
“Ita Timór ne’e nasaun ida, ita labele halimar ho nasaun. O Timór-oan no sidadaun rai ida ne’e nian ba halo fali juramentu iha nasaun seluk. Ida ne’e hanesan traisaun, ita Timor ne’e tenki mate ba Timór no defende ba Timor, hanesan maluk sira ne’ebé mak uluk mate ka moris ukun rasik-an no dezenvolve ba rai ida ne’e. Nusa mak ita tenki ba halo juramentu no sa’e sabuk iha Indonézia ne’eba”, dehan Lere.
Nia hatutan, la’ós ba hakruk ba nasaun seluk tanba nasaun Timor-Leste harii ho ruin no ran, presija ema hotu nia kontribuisaun hodi lori nasaun ne’e ba oin.
“Tanba joven mak futuru nasaun Timor-Leste nian. Tan ne’e, ha’u husu ba governu atu kria regra ida ne’ebé mak rigorosu hodi kontrola no regula Arte Marsiál sira ne’e. Nune’e labele mosu tan konfrontu no instabilidade iha rain doben ida ne’e”. Tenik Lere. Flo