Ministru Fernando Hanjam Justifika Proposta OJE 2020 ba PN
Naunil Media (Díli), Kinta (17/09) ne’e, Governu liu husi Ministru Finansas Fernando Hanjam, justifika razaun importante ba deputadu sira iha Parlamentu Nasionál kona-ba pedidu debate Orsamentu Jerál Estadu (OJE) ho karate urjénsia.
“Governu nia prejensa iha uma fukun atu justifika ba deputadu sira kona-ba pedidu prioridade urjénsia ba proposta lei OJE 2020 ho intensaun atu normaliza hikas ezekusaun orsamentu no hasa’e kresimentu ekonómiku inklui mos atende nesesidade prioridade sira”, Ministru Finansas Fernando Hanjam, justifika liu husi plenária iha Parlamentu Nasionál.
Membru Governu konstitusionál da-ualu, Fernando, fundamenta normalizasaun ezekusaun orsamental ne’e importante tanba to’o ohin loron Estadu halo despezas nian sustenta de’it ho Dotasaun Temporáriu Orsamentu (DOT).
“Sentidu ida ne’e tuir prinsípiu no regra DOT aplika de’it ba aktvidade sira ne’ebe ho objetivu asegura funsionamentu mákina estadu nian enkuantu suspende projetu investimentu estratéjiku sira iha area dezenvolvimentu” dehan Ministru ne’e.
Tuir Governante ne’e, ho aprovasaun OJE 2020 bele normaliza hikas funsiunamentu Estadu hodi asegura prestasaun servisu liu husi responde nesesidade no aspirasaun povu no Nasaun.
Ikus, Nia dehan, razaun seluk mak atu hasa’e kresimentu ekonómiku hanesan dezempeña ekonomia naun-petrolíferas hodi haree ba papél Estadu nian liu husi despezas públika. Lop
