Berta : TL Presija Polítika Estável Hodi Promove Paz

Naunil Media (Maliana), Kandidatura Prezidente Repúblika (PR) ho númeru sorteiu sia (9), Armanda Berta dos Santos, deklara Timor-Leste (TL) presija polítika ne’ebé estável promove paz, estabilidade hodi garante ba atinji dezenvolvimentu nasionál fó moris di’ak ba povu tomak.   

“Tenke simu malu, katak povu ida de’it hodi goja ukun rasik àn. Atu alkansa ida ne’e presiza polítika ida estável hodi hametin unidade nasionál no foku ba dezenvolvimentu fó moris di’ak ba povu”, kandidatura ho númeru sorteiu 9, Berta, halo afirmasaun ne’e, liu husi komísiu kampanha Eleitoral mak hala’o iha Kampu futeból Maliana, Sábadu (12/03).    

Berta hateten, karik povu fó fiar hodi eleita núdar Prezidente Repulíka, maka nia sei servisu maka’as hodi garante estabilidade rai-laran no fó moris di’ak ba povu.

Tuir nia, presija mos polítika externa di’ak ho nasaun sira seluk atu apoia dudu dezenvolvimentu ho lalais no kualidade.

“Mai ho ha’u nia kumprimisiu, karik eleita mak sei promove mos identidade nasionál ba mundu atu hatudu Timor-Leste iha kultura rasik”, dehan kandidatura ne’e núdar mos Prezidente Partidu KHUNTO.

Ikus nia dehan, Prezidente iha kna’ar mós atu promove simbùlu tradisíonais hanesan Lingua, Uma Lisan ,Tais no fiar kristaun konvensoes relijiojos. Ana