Armanda : Eleita Ba PR, Sei Fó Hanoin Governu Hadi’ak Moris Povu Nian
Naunil Media (Liquiça), Kandidatura Prezidenti Republika (PR) periodu tinan 2022 – 2027 ho númeru sorteiu sia (9), Armanda Berta dos Santos, hateten, karik povu fo fiar hodi eleita núdar Xefe Estadu, mak sei fo hanoin ba governu atu jere lolos Mina Rai no Gas hodi hadi’ak moris nian.
“Dau-daun, Ita depende hela ba Riku soin sira hanesan Mina Rai, Gas, Marmer no rekursu seluk tan Ita tenke jere lolos riku soin sira ne’e hodi uja ba povu nia moris diak”, dehan kandidatura ho númeru sorteiu 9 ne’e, hateten liu husi komísiu kampanha Eleitoral iha munisípiu Liquiça, Kampu Futeból, Sesta (11/03).
Iha fatin hanesan, konseleiru máximu Partidu Kmanek Haburas Unidade Nasional Timor Oan (KHUNTO), Jose dos Santos Naimori Bukar, deklara Berta mak sai prezidenti ba periodu 2022-2027 Sei mosu buat foun iha nasaun Timor-Leste hodi hadi’ak povu nia moris.
“Se, Berta mak sai duni Prezidente tinan lima sei mosu buat foun iha Timor-Leste joven sira sei la baku malu no joven sira sei la estraga tan nasaun nee”, tenik naimori núdar mos laen husi Armanda Berta.
Nia husu joven sira haluhan tiha pasadu hodi hateke fila fali ba futuru hodi hadi’ak rai doben Timor.
Tuir observasaun www.naunil.com iha terenu, kampaña ba dala sia (9) iha Liquiça hetan partisipasaun màximu husi militantes simpatizantes no mos hetan observador Internacional, nacional no hetan seguransa màximu husi PNTL munisípiu. Ana
