FOKUPERS Konsidera Desizaun Papa Francisco Justu
Naunil Media (Díli), Diretóra FOKUPERS, Maria Fatima Guterres , deklara FOKUPERS konsidera desizaun ne’ebé Papa Francisco foti hasoru eis Pe. Richard Daschbach ne’e justu, nune’e públiku presija respeita desizaun husi líder Igreja katólika nian.
“Ami agradese no hato’o ami-nia apresiasaun ba Konferensia Episcopal Timorense, komunikadu ne’ebé públika iha loron 28 Janeiru 2021, hodi klarifika ba públiku kona-ba sr. Richard Daschbach nia pozisaun ne’ebé oras ne’e sai polemika no preokupasaun ba iha sosiedade. Desizaun Sua santidade Papa Fransisco justu, prudente no final nu’udar líder Igreja Katólika universal, nune’e ami la iha duvida ba disizaun ne’e”, Diretóra FOKUPERS, Maria Fatima Guterres, ba jornalista sira liuhusi konferensia imprensa, iha salaun FOKUPERS, Farol, Tersa (02/02).
Maria hatutan, FOKUPERS agradese ba komprimisiu Igreja nian hodi kolabora ba prosesu tomak. FOKUPERS rekoñese katak luta ba diretu umanu iklui dirietu feto no labarik mak parte inportante ida husi igreja nian papel dezde inisiu. Tanba ne’e FOKUPERS sei nafatin kontinua servisu hamutuk ho igreja nu’udar parseiru inportante hodi alkansa objetivu nasionál ba direitus umanus no igualidade jeneru.
“Ba públiku atu para ona, hodi fahe tutan vítina sira-nia istória sira hodi la provoka situasaun ne’ebé iha, maibé mai ita respeita desizaun Igreja ne’ebé fo sai ona hodi kontribui ba prosesu legal ne’ebe la’o hela iha nasaun ne’e”, Maria informa.
Nia afirma, publiuksaun ne’ebé FOKUPERS públika iha tinan kotuk, tanba prosesu justisa ba kazu ne’e la’o dadauk ona no lalika prezudika prosesu ne’e ho publikasaun ne’ebé bele provoka ka influensia prosesu justisa. “Mai ita hotu tau matan ba prosesu justisa bele la’o ho justu no inparsial. Ho konsiensia umanu no dignu tuir vizaun no misaun FOKUPERS iha sein interese sira seluk. FOKUPERS la iha interese atu hamonu instituisaun ruma nia dignidade.
Fokupers apoiu vítima sira nia lian halerik, buka justisa no respeita ema hotu nia direitu no dignidade umanu. FOKUPERS nia komprimisu hodi defende no aseguransa privasidade vítima sira-nia mak inportante tebes”. Tenik Maria. Ipe/jon
