PATIFOR Sei Tun Ba Baze Rekolla Hikas Eleitoral
Naunil Media (Díli), Prezidente Interinu Partidu Timor Forte (PATIFOR), Gregório Saldanha ‘Mouris’, hateten ekipa PATIFOR sei tun ba baze hodi rekolla fila-fali eleitoral husi apoiante sira, tanba la priense rekezitu adiministrativu husi Ministériu Justisa iha Diresaun Nasionál Servisu Registo no Notariadu (MJ-DNSRN).
Prezidente Interinu PATIFOR, Gregório ‘Mouris’, ba jornalista sira liuhusi komunikadu imprensa, iha Sede PATIFOR, Farol, Tersa (02/02).
“Ami nia-ekipa tun fali ba baze hodi kompleta kartaun eleitoral ka formulariu rezistu orizinál balu ne’ebé lakon no la hetan legalizasaun husi Ministériu Justisa, hafoin simu fali kaixa dokumentu sira husi tribunal rekursu”, dehan Gregorio.
Grigório Mouris lamenta, ho MJ-DNSRN tamba durante prosesu triagem iha fulan 3, la notifika PATIFOR hodi hadiak kedas sala ne’ebé infelizmente, ikus mai tribunal rekursu mak tenki hala’o fali kana’ar hodi deteta falta sira.
“Ami husu MJ-DNSRN atu responsabilidade, imparsibilidade, profesionalismu no transparansia, hodi labele prejudika sidadun sira-nia direitu siviku, atu hari’i partidu polítiku hodi kontribui mós ba dezenvolvimento hadi’ak povu nia moris iha rain Timor-Leste ne’ebe ita hotu hadomi”, Nia sujere.
“Ha’u hakarak apela ba kuadrus, militants no simpatizantes PATIFOR nian iha rai laran ka rai li’ur, atu manten kalma, no neon metin hodi fó apoiu nafatin ba estrutura interinu PATIFOR, hodi hadi’ak dokumentus sira ne’ebé sei menus (kurang), atu bele submete fali ba prosesu rejistu foun iha tempu badak. Sei fo orientasaun ba maluk kordenadór regional sira no sira sei hatutan ba kordenador munisipal no delegadus sira hodi hala’o servisu ida ne’e”, nia informa.
Ikus liu nia husu kordenador rejional kordenador munisipal no delegadu sira, hamutuk ho militantes, simpatizantes no apoiantes PATIFOR sira atu hametim unidade FORTE nafatin, pasiensia nafatin, servisu maka’as nafatin hodi kumpri lei sira ne’ebé vigora iha Timoi-Leste.
“Nune’e ita bele alkansa objetivu hodi hari’i PATIFOR nudar partidu polítiku ida legal, hadi bele hatutan povu Timor-Leste nian mehi bo’ot ba moris di’ak, moris ho digno, moris iha justisa sosial no moris ho oportunidade hanesan”. Tenik Gregorio. Ipe/Emj2
