KM aprova projetu dekretu lei estatutu karreira edukador
Naunil Media (Díli), Sorumutuk Konsellu Ministru (KM) nian iha loron 8 fulan Marsu tinan 2023, konsellu Ministru (KM) aprova ona projetu Dekretu-Lei ida, ne’ebé aprezenta husi Ministru Edukasaun, Juventude no Desportu (MEJD) Armindo Maia, ba alterasaun ba Dekretu-Lei n. 23/2010, loron 9 fulan-dezembru, ne’ebé aprova Estatutu Karreira Edukadór sira ba Infánsia no ba Profesór Ensinu Báziku no Sekundáriu (Estatutu Karreira Dosente nian).
“Alterasaun ida-ne’e hakarak atu atualiza Estatutu Karreira Dosente hodi akomoda evolusaun no dezafiu sistema edukativu daudaun ne’e nian iha Timor-Leste, i atu fó kontinuidade ba dezenvolvimentu rekursu umanus nasionál, hodi promove kualifikasaun profesór sira nian no atu asegura katak hirak ne’e tenke koloka tuir nesesidade reál país nian”. Dehan ministru prezidensia konsellu ministrus Fidelis Manuel Leite Magalhães ba jornalista iha palásiu governu.
Governante ne’e hatutan, hakarak atu hametin valorizasaun karreira liu husi sistema regulár sira atu halo verifikasaun (aferisaun) ba kompeténsia sira no prevee mekanizmu formasaun no avaliasaun dezempeñu nian ne’ebé bele garante kualidade sistema edukasaun no ensinu nian.
Aleinde ne’e, Dekretu-Lei ida-ne’e determina estabelesimentu sistema rekrutamentu ida ba dosente foun sira liu husi kriasaun Bolsa Kandidatura sira nian no kria rejime espesiál ida ingresu nian ba profisionál sira edukasaun nian ne’ebé dedika an ba ensinu no ne’ebé hetan ona abilitasaun mínima ne’ebé lei haruka hodi bele tama ba karreira.
Nune’e, alterasaun sira ba Estatutu Karreira Dosente ninia objetivu mak atu garante kualidade ensinu no profesór sira nian, hodi promove meiu sira atu halo selesaun, verifikasaun no kolokasaun husi rekursu sira, bazeia ba méritu no profisionalizmu, no ho adaptasaun ba nesesidade nasionál sira.
Enkuantu ba indivíduu kontratadu sira ne’ebé mak ezerse hela funsaun dosente durante tinan 2023 maibé laiha abilitasaun akadémika mínima ne’ebé presiza atu sai dosente, sei garante oportunidade atu hili kona-ba sira nia futuru, hanesan rekoñesimentu ba sira nia dedikasaun ba sistema edukasaun nasionál nian.
Nune’e, sira bele hili entre kontratu provimentu ba tempu indeterminadu atu ezerse funsaun administrativa ka funsaun apoiu ba dosénsia, ho remunerasaun ekivalente ba Grau D, eskalaun dahuluk, husi rejime jerál administrasaun públika nian, ka indemnizasaun ida hanesan kompensasaun ba dedikasaun tempu servisu nian, ho valór saláriu ida ba tinan tolu ida-idak iha ne’ebé nia ezerse funsaun sira, tuir períodu kontratasaun ne’ebé rejista ona iha SIGAP. LTS
