TL Kontinua Ho Impase Politiku, RDDU Konsidera Violasaun Direitus Umanus Hasoru Povu

Naunil Media (Díli), Organizasaun Rede Defensor Direitus Umanus (RDDU) konsidera polítiku na’in sira halo violasaun hasoru povu ki’ik, tanba Timor-Leste kontinua moris ho impase polítiku nune’e orsamentu jerál estadu (OJE) 2020 faze jeneralidade lapasa iha Parlamentu Nasionál (PN).
“RDDU konsidera situasaun OJE ne’ebe sumba iha parlamentu nasionál nu’udar aktu violensia direitus umanus ida ba povu ki’ik sira atu asesu ba fornesementu be’e mos, saude, Ai-han ne’ebe ho nutrisaun di’ak, eletrisidade, asesu kampu traballu, edukasaun ne’ebe kualidade no seluk seluk tan”, esplika Porta voz RDDU, Rita Mendonca, liu husi komunikadu imprensa iha Yayasan HAK Farol, Dili.
Rita Mendonca ejije, líder nasionál sira atu labele arogante, egoismu, hodi hases interese privadu no grupu nian, maibe tau a’ás interese povu no nasaun nian nune’e bele hakotu ona impasse polítiku, tanba povu labele kontinua sai vítima.
“Husu ba exelentisimu Presidente Repúblika atu tetu didi’ak opsaun hotu, atu foti desizaun labele hanaruk impasse polítika iha rai laran. Husu ba líder partidu polítiku sira mak hetan asentu iha parlamentu nasionál atu kolabora ho líder nasionál, orgaõ soberania liu husi diálogo”, salienta Nia.
Porta voz ne’e husu mos ba joventude iha teritóriu Timor tomak atu hakmatek nafatin no fó tempu ba líder nasionál sira buka solusaun ba situasaun polítika iha rai laran.
Organizasaun ne’e mos husu ba líder rezistensia veteranus, sosiedade Igreja atu kolabora ho líder nasionál hodi buka solusaun lalais ba situasaun impasse politiku ne’e.
RDDU sujere mos “Ba Falintil-Forsa Defeza Timor-Leste (F-FDTL) no Polísia Nasionál Timor-Leste (PNTL), atu kontinua serbisu ho profisionál hodi mantein paz no estabilidade nu’une líder nasionál sira bele fokus hodi buka solusaun ba situasaun polítiku”.
“Husu akademiku intellectual, sosiedade sivil no observdor politiku sira atu bele fo apoio ideias no opsaun ne’ebe konstrutivu no pozitivu atu ajuda Prezidente Repúblika hodi promove diálogu konstrutivu ho líder nasionál sira”, sujere organizasan RDDU.
RDDU fó konfiansa ba Presidenti Repúblika, orgaun soberania hotu no líder partidu polítiku sira bele rona malu hodi hakotu impasse polítiku.
Impasse polítiku iha Timor-Leste la’o kuaze tinan tolu liu, iha ne’ebe akontese iha tinan 2017 no dadaun ne’e iha VIII governu, iha tinan 2020 bainhira OJE 2020 la passa iha fase jeneralidade iha Parlamentu Nasionál tanba bankada governu CNRT la a favor ba proposta ne’ebe aprezenta husi governu aliansa mudansa ba progresu (AMP). OJE faze jeneralidade aprezenta husi Primeiru Ministru Taur Matan Ruak, iha loron 13 to’o 15 fulan janeiru, iha ne’ebe hanesan públiku hotu hatene deputadu na’in 13 a favor, 15 kontra no 25 abstensaun. Leo