Impase Politiku La’o Tinan Tolu Liu, Lere : Situasaun Seguransa Rai Laran Hakmatek
Naunil Media (Díli), Xefi Estadu Maior Jeneral FALINTIL-Forsa Defeza Timor-Leste (F-FDTL-Sigla Português), Maijor Jeneral Lere Anan Timur, hateten situasaun iha rai laran kontinua la’o hakmatek, maske Timor-Leste infreta problema impase polítiku kuaze tinan tolu liu.
“Hasoru malu ho prezidente la’os koalia kona-ba politika, maibe prezidente husu mai hau kona-ba seguransa, ita bele dehan seguransa rai laran to’o agora la Grave liu”, Hateten Lere ba jornalista sira hafoin sorumutuk semanal ho Prezidente Repúblika Francisco Guterres ‘Lu-Olo’ iha Palasiu Prezidensial Bairu Pite, Kinta (12/02/2020).
Veteranu ne’e hateten konflitu ne’ebe mak babain akontese kria mai husi Grupu Arte Marsia, maibe agora dadaun situasaun la’o ho hakmatek, maske iha loron 03 Fevreru tinan ne’e akontese konfrontu entre jovens husu munisipiu Baucau suku Tekinomata no Namanei ne’ebe rezulta ida kanek todan no nain rua kanek kmán, no problema refere iha hela prosesu justisa.
Eis gerileiru komadante Ponta Leste apela ba grupu ki’ik sira ne’ebe koko Estadu hodi kria instabilidade, ne’e sei simu ninia konsikuensia. Dms
