SEPS Joaquin Agradese Apoia Ajénsia Internasionál ba TL
Naunil Media (Díli), Sekretáriu Estadu Protesaun Sivíl (SEPS), Joaquin Gusmão agradese ba ajénsia internasionál ne’ebé durante ne’e fó ona apoiu dezastre naturál iha Timor-Leste (TL).
“Foin mak primeira vez SEPS loke enkontru ida ne’e aumesmo tempu hodi fó apresiasaun no agradese ba ita-nia parseiru sira hotu ne’ebé durante apoia ona liu-liu ba dezastre naturál ne’ebé akontese iha Timor-Leste. Enkontru ne’e ita hamutuk ho parseiru sira hanesan ajénsia Nasoens Unidas no sira seluk hodi ko’alia kona-ba kooperesaun servisu liu-liu iha area protesaun sivíl nian”, SEPS, Joaquin Gusmão ba jornalista sira hafoin enkontru ho ajénsia internasionál sira iha Timor-Leste, iha JLL Villa, Tersa (22/09).
Governante ne’e hatutan, SEPS prepara ona planu ba oin halo kooperasaun internasionál sira sai hanesan prioridade ba protesaun sivíl nian, iha legalidade ho rekursu sira no ekipamentu sira infraestrutura ne’ebé presija iha protesaun sivil nian.
“Iha enkontru ida ne’e mós, ha’u hato’o ita-nia planu koperasaun ba iha ita-nia parseiru sira hodi sira bele hatene saida de’it mak sai prioridade no preokupasaun iha servisu protesaun sivíl nian. Nune’e ita-nia parseiru sira bele enkaixa ba sira nia planu, hodi sira bele fó asistensia ba preokupasaun servisu protesaun sivíl nian”, tenik nia.
Nia dehan, durante enkontru ne’e aprezenta ba parseiru sira kona-ba planu protensaun tempu udan tanba tempu udan mós besik.
Iha enkontru ne’e abertura ofisialmentu husi vise Ministru Interior António Armindo, hetan partisipa husi embaixadór Estados Unidos Amerika, Japun, Malaizia, Australia, Nova Zelandia, Brazil no Ajénsia Internasionál sira iha Timor-Leste. Emj5
