KM Altera Dekretu Governu Bandu Sidadaun Hotu Labele Halibur Malu Liu Nain-10
Naunil Media (Díli), VIII Governu konstitusionál liu husi reuniaun Konsellu Ministru (KM) halo alterasaun dahuluk ba dekretu governu n.°18/2020 loron 3 Dezembru kona-ba medidas ezekusaun deklarasaun estadu emerjénsia atu obriga sidadaun hotu uza máskara, fase liman bebeik ho sabaun no kumpre distánsiamentu sosiál.
Dekretu governu ne’e aprezenta husi Primeiru-Ministru ein ezersísiu, José Maria dos Reis, bainhira reuniaun konsellu ministru extra-ordináriu, Tersa (29/12) iha Palásiu Governu.
Ministru Prezidénsia Konsellu Ministru, Fidélis Magalhães informa, projetu dekretu governu n.°18/2020 loron 3 Dezembru, kona-ba medidas sira ezekusaun deklarasaun estadu emerjénsia ne’ebé efetua husi dekretu Prezidente Repúblika n.°7/2020 husi loron 3 dezembru, atu hatán ba agravasaun situasaun sanitária iha provínsia Timor Osidentál iha Repúblika Indonézia.
“Halo alterasaun dekretu governu ida-ne’e hodi hatán ba agravamentu ba situasaun sanitária iha Timor Osidentál iha Repúblika Indonézia no mós iha rejiaun no mundu tomak. Ita hotu hatene katak, númeru infetadu aumenta nafatin iha paíz viziñu sira, no mós foin lalais deskobre tan ona tipu foun ida husi vírus SARS-CoV-2,” dehan Ministru Fidélis Magalhães.
Ministru Fidélis esplika, tipu vírus foun ne’e, tuir estudu barak hatudu, variasaun kontajia lalais liu kompara ho vírus corona, no posibilidade variasaun foun ne’e sei fó perigu boot ba ema-nia saúde no vida.
“Ho alterasaun ba dekretu governu ba deklarasaun estadu emerjénsia ida-ne’e, pontu prinsipál husi alterasaun ne’e mak redefine fali distánsiamentu sosiál halo metin liután regra sira kona-ba distánsiamentu sosiál ba individu hotu ne’ebé mak hela iha Timor-Leste,” esplika nia.
“Hakarak aviza ba públika katak, obrigatóriu ba ita hotu atu implementa dekretu governu ida-ne’e, husu mantein distansia pelu menus métru ida entre ema ida ho ema seluk,” subliña nia.
Dekretu Governu ne’e mós bandu sidadaun sira atu halibur malu liu ema na’in 10, nune’e evita kontájiu surtu Covid-19 iha Timor-Leste.
Dekretu governu ne’e mós bandu sidadaun sira labele halo serimónia ida liu ema na’in 10, fase liman beibeik ho sabaun, bainhira tama ba loja laran no asesu iha fatin públiku no fila ba uma, no mós uza máskara bainhira tama iha resintu públiku. Lop
