Molok kampaña Berta Simu Matak Malirin iha uma Lisan Bukar-Laitua
Naunil Media (Díli), Kandidatura Armanda Berta dos santos simu ona matak malirin husi uma lisan Bukar Laitua asegura kandidatura durante prosesu kampaña eleitoral.
Tuir konselleru Maximo Jose Dos Santos Bukar “Naimori” hateten, Halo kualker atividade ruma presiza respeita kultura hodi simu matak malirin husi lisan, nune’e natureza haraik bensaun nafatin hodi asegura prosesu tomak.
“Iha Kualker atividade ida ba nasaun nian, ba dala uluk ita tenke respeita ita nia kultura, tanba ho kultura sai hanesan indentidade ba ema Timor-oan, atu nune’e ema hotu bele respeita kuandu atu halo atividade ida nune’e ita nia natureza akompaña ita nia polítika ne’ebé mak atu lao dau-daun iha iha festa demokrasia”, dehan Konsellu Maximu Jose Do Santos Bucar “Naimori” ba jornalista sira iha ambitu serimonia nahe Biti bo’ot iha uma lisan Bukar-Laitua iha Soru Kraik, Ainaru, tersa (01/03).
Naimori hatutan, Atu atinji mehi ne’e mak kandidata Armanda Berta mai ho nai datu sira lisan sira ne’ebé mak iha Ainaru, liliu iha rai Soru Kraik atu mai tula bua ho malu signifikadu atu husu matak malirin atu nune’e Armanda Berta nia kampaña bele lao ho di’ak.
Hafoin simu matak malirin iha uma lisan Bukar kandidatura Armanda Berta Dos Santos sente kontenti tebes simu bensaun husi uma lisan nune’e natureza bele akompaña atividade kampaña eleitoral.
“Ha’u sente kontenti tanba husi ita nia lisan rasik desde husi inisiu ita la bele husik ita nia identidade, tenke rekoñese lisan nune’e presiza duni matak maliri husi ita nia lisan rasik, ohin simu matak malirin husi lisan atu nune’e iha kampaña prezidente ida ne’e, bele akompaña iha eventu impostante ida ne’e,”informa Armada Berta dos santos.
Tuir orariu aban kandidatura ho númeru sorteiu 9 Armanda Berta dos Santos, halo abertura kampaña iha munisípiu Ainaro. Ana
