Tempu Kuarezma Uma Kreda Husu Sarani Sira Presiza Tulun Malu

Naunil Media (Díli), Amo Reitor Semináriu Maior São

Pedro São Paulo Fatumeta Padre Eduardo de Almeida hateten tempu Kuarezma durante loron haat nulu (40) nia laran sarani sira presiza tulun malu.

“Agora tempu Kuarezma no iha loron haat nulu (40) nia laran,  uma kreda husu ita atu halo saida iha ita nia preparasaun,  ita halo saida ohin dehan katak tulun ema kiak sira ne’e mak ita fó ita nia esmola atu tulun ita nia maluk sira ne’ebé mak presiza”,  dehan Amo Reitor Semináriu Maior São  Pedro São Paulo Fatumeta Padre Eduardo de Almeida ba jornalista sira hafoin misa Kuarta Sinzas iha Kapela Semináriu Fatumeta, Kuarta (02/03).

Padre Eduardo de Almeida mós hatutan,  Iha tempu Kuarezma ne’e sarani sira presiza halo orasaun ba ida-idak nia a’an,  no mós ba povu no nasaun sira ne’ebé presiza hanesan mós Amo Papa apela ba mundu tomak katak halo orasaun espesial ba povu Ukránia nune’e bele hetan Paz.

“Ita halo ita nia orasaun, orasaun ba ita nia aan no ba ema seluk ne’ebé presiza liu-liu ba rai sira ne’ebé presiza no oras ne’e Amo Papa mós apela ba mundu tomak no liu-liu ba ita sarani ohin Kuarta Sinzas ne’e,  ita nia sakrifisiu no ita jezum ba povu Ukránia atu bele hetan paz”,  katak Padre Eduardo de Almeida.

Amo Reitor Semináriu Maior Fatumeta ne’e hateten,  Pontu iha tempu Kuarezma nia laran mak  jezum ho abstinensia mak baibain konsumu barak demais,  karik oras ne’e hamenus uituan atu bele fahe fali ba maluk sira ne’ebé presiza tebes.

Nia dehan,  Sarani hotu-hotu iha tempu Kuarezma ida ne’e aproveita tempu ne’e didi’ak,  atu bele halo atitude di’ak hanesan espíritu Kuarezma ninian, ne’ebé husu ba sarani ida-idak atu halo, tanba hahú Kuarezma ne’e ho Maromak nia grasa tebes duni prepara aan ba festa paskua.

Nia esplika,  Hahú tempu Kuarezma ne’e ho simu ahi-kdesan, hahú tempu Kuarezma katak loron haat nulu (40) antes paskua ne’e ho ahi-kdesan hodi fó hanoin ba sarani katak sarani sira ema maksala, frazil no fraku ne’ebé iha tempu di’ak ida ne’e atu hadia a’an no prepara a’an atu ba festa paskua.*Jos