Pe Eduardo: Husu Líder Polítiku Hato’o De’it Vizaun Misaun Iha-Kampaña

Fahe Tutan

Naunil Media (Díli),  Amo Reitor Semináriu Maior São Pedro São Paulo Fatumeta Padre Eduardo de Almeida husu ba líder partidu polítiku sira atu hato’o de’it vizaun no misaun iha tempu kampaña,  tanba povu mak fó konfiansa iha fatin votasaun.

“Ba Nai ulun kuandu sira iha sira nia kampaña mak envez de hato’o sira nia vizaun no misaun,  ne’ebé hakarak lori povu ne’e ba di’ak,  maibé sira mak trata malu povu mak sei fó konfiansa iha fatin votasaun”, dehan Amo Reitor Semináriu Maior São Pedro São Paulo Fatumeta Padre Eduardo de Almeida ba Jornalista sira hafoin misa Kuarta Feira Sinzas iha Kapela Semináriu Fatumeta, Kuarta (02/03).

Padre Eduardo hatutan,  líder partidu polítiku no Kandidatu sira mesak sarani de’it no mesak sidadaun ne’ebé di’ak,  tanba ne’e hakarak kandidata a’an ba Prezidente Repúblika hahú husi ko’alia no kampaña nune’e militante no simpatizantes sira haree hodi serve sai aman ba nasaun ka lae.

“Ita mós husu katak sira mesak sarani de’it sira mesak ema sidadaun di’ak,  tanba ne’e mak sira hakarak kandidata a’an atu sai ema númeru 1 iha nasaun ida ne’e, ne’ebé ita hein katak hahú husi sira nia ko’alia, sira nia kampaña ne’e mak ita bele haree hodi bele halo oinsá nia ne’e serve duni sai Prezidente Repúblika ka lae”,  katak Padre Eduardo.

Amo Reitor Semináriu Maior Fatumeta ne’e hateten,  Iha leitura Domingo liu ba ne’e mak furak teb-tebes katak agora ne’e atu hahú kampaña, husi kampaña ne’e mak povu hotu-hotu fó atensaun didi’ak rona sira nia programa, sira nia konseitu no saida mak sira nia vizaun no misaun,  hakarak halo ba povu ida ne’e no rai ida ne’e husi ida ne’e mak povu atu fó nia votu de konfiansa.

Nia dehan,  Hanesan leitura Domingo liu ba, tanba sarani fó votu de konfiansa ne’ebé fó votu de responsabilidade katak hili ho konsensia no responsabilidade tanba fó votu ida ba ema ida atu lori nasaun, entaun iha leitura semana kotuk ne’e mós dehan labele hili matan delek ida atu dada matan delek ida tama hotu ba rai kuak

Padre ne’e mós fó mensajen ba povu Timor-oan tomak mak ho esperiénsia naruk terus dala barak ona,  hahú husi referendu tesik mai hatene ona saida mak sira hakarak hili ba sira nia di’ak,  no ba rai ida ne’e ninia di’ak, maibé nu’udar sarani halo orasaun mós akompaña nafatin atu líder polítiku sira mós hatudu sira nia maturidade polítika,  hatudu sira nia kapasidade hanesan ema kandidatu sai Prezidente Repúblika ou aman ba nasaun ida ne’e. *Jos

Leave a Reply

Your email address will not be published.