Xefí Kaza Sivil Ható Agradese Ba Povu Manufahi No Ainaro

Naunil Media (Ainaro), Xefí Kaza Sivil Francisco Maria de Vasconcelos ható agradese ba Populasaun sira husi Munisípiu Manufahi  no Ainaro, tanba simu ekipa husi Prezidensiál Repúblika ho diak.

Lia hirak ne’e ható husi Xefí Kaza sivil liu husi diskursu iha Salaun Administrasaun Munisípiu Ainaro, Tersa (17/08).

“Hakarak agradese ba Ita boot sira hotu ba Munisípiu Ainaro iha resesaun ba ami hahú horseik iha Maubisse iha udan, maibé ita bo’ot sira simu ami ho laran, ho laran malirin Prezidente Munisípiu no mós Administrador posto administrativu Maubisse, ohin ami haksolok tanba ita boot sira mós halo resesaun nafatin ba ami iha fatin ida ne’e”,  Dehan Xefí Kaza Sivil.

Xefí Kaza Sivil hateten,  Prezidenti Repúblika Francisco Guterres “Lú Olo”  mós hato nia Komprementa ba Prezidente Autoridade munisipiu no povu tomak iha munisipiu rua ho posto administrativu tomak ne’ebé mak bele halibur hamutuk iha fatin ida ne’e.

Nia hatutan, Prezidenti Repúblika la kansela nia vizita ba iha Munisipiu Manufahi no Ainaro, Maibé PR adia halo dialogu ho Komunidade sira iha munisipiu rua no razaun adia, tanba Médiku sira mak rekomenda PR labele halo Viajen lai no tempu badak mak PR sei halo vizita ba munisipiu rua.

PR hanesan Xefí Estadu no hala’o mandatu tuir konstituisaun haruka, no Prezidente la’ós Ezekutivu no Ezekutivu mak ministru sira.

“Hodiseik ha’u halo vizita iha Maubisse iha Centru prosesamentu kafé no kuda modo depois horseik ami mós ba haree iha Manufahi,  haree Universidade sira iha ne’ebá, haksolok tebes tanba iha kosta sul ne’e iha Dezenvolvimentu ne’ebé mak makaas tebes husi edukasaun iha Instituto Betano no iha Instituto BoaVentura ita haree komesa buras no matak ba bebeik” katak nia.

Nia dehan, PR tempu badak sei mai vizita munisipiu rua ne’e no halo dialogu ho Komunidade sira hodi rona direta preokupasaun no difikuldade sira ne’ebé mak povu sira hasoru iha Munisípiu rua ne’e rasik.

Iha Fatin hanesan Administrador Munisipiu Ainaro Leovirgilio Amaral Pereira mós lori komunidade sira nia naran ható agradese ba Prezidensiál Repúblika ho nia ekipa ne’ebé mak vizita ona Munisípiu Ainaro hodi haree no rona direta komunidade sira nia Preokupasaun.

“Iha ne’e ha’u hakarak lori komunidade hotu nia naran ható agradese tebes ba Prezensa mai iha Ainaro, ha’u lori Administrador nain haat 4 nia naran xefe suku 21 xefe aldeia 131 no ita nia populasaun hamutuk Rihun neen nulu resin neen atus ida rua nulu resin lima ható Bemvindo ba sua Excelensia sira hotu ne’ebé bele hiit aan mai iha ne’e hodi haree besik liu tan Ainaro nia furak no dezafiu ne’ebé mak infrenta loron-loron” dehan Administrador Munisipiu Ainaro.

Autoridade Munisípiu ne’e hatutan iha Munisípiu Ainaro iha Eskola balun ho kondisaun ne’ebé mak aat tebes liu fali Escola ne’ebé mak Xefí Kaza Sivil ho ekipa Vizita ne’e tanba, ne’e husu atu vizita hodi haree direta no bele ható ba PR “Lú Olo’ hodi hatutan ba Governu hodi tau atensaun.

“Ha’u nia lian Menon ható ba PR nune’e tempu badak bele halo vizita mai Ainaro nune’e bele haree direita komunidade nia terus no susar”,  Nia hakotu. *Jos