FEATUREDIkus LiuNewsPolitika

Mericío Akara : Informasaun Falsu Sai Ameasa ba TL

Fahe Tutan

Naunil Media (Díli), Sekretáriu Estadu Komunikasaun Sosial, Mericío Juvenal dos Reis ‘Akara’, hateten hoax (informasaun falsu) sai ameasa real ba sosiedade no destroi unidade povu Timor-Leste.

Relasiona ho preokupasaun ne’e Governu konstitusionál da-ualu, liu husi Sekretaria Estadu Komunikasaun Sosial-SEKOMS, hala’o programa kampaña nasionál kombate informasaun hoax no Promove Internet Saudavel iha Largo Lecidere, Sesta (18/09).

Hoax ou lia falsu sai duni ameasa real iha mundu, sei fó impaktu hodi destroi ita-nia unidade iha sosiedade, bele destroi mos ita-nia nasaun, tanba loron ba loron ita gasta  enerjia trata malu,  atu hatun malu, enerjía pozitivu atu dezenvolve oituan”, Sekretáriu Estadu Komunikasaun Sosial, Mericío Juvenal dos Reis ‘Akara’, ba jornalista sira iha Largo Lecidere.

Tuir membru Governu konstitusionál da-ualu, Mericío Akara, karik la kombate hoax, loron ruma sidadaun sira gasta enerjía tomak ba lia falsu.

“Enerjía pozitivu atu dezenvolve ita nia rain ne’e sai ki’ik, ida ne’e mak ita konsidera sai hanesan ameasa ba futuru nasaun nian”, tenik Akara

Iha fatin hanesan Prezidente Autoridade Nasional Komunikasaun (ANC-Sigla Portués), João Olivio Freitas, hateten atu prevene hoax tenki ko’opera malu no iha responsabilidade atu kontribui ba dezenvolvimentu nasaun.

“Atu hariii nasaun ida ne’e la’ós ema ida nian deit, la’ós Prezidente  Repúblika de’it, la’ós Primeiru Ministru deit no la’ós membru Governu de’it, maibé ita hotu, ita iha responsabilidade, atu kontribui ba dezenvolvimentu nasaun nian”, dehan Prezidente ANC, João

Tuir Nia, atu prevene hoax responsabilidade ema hotu no koñsiénsia utiliza meius komunikasaun fahe informasaun.

“Ema individual uza sasan tenki ho konsiensia ba dezenvolve buat ne’ebé mak di’ak.  Sé ita hakarak kuda veneno iha ita nia kakutak, ita sei hatene ninia impaktu ba futuru, maibé ita hahú agora kuda buat ne’ebé mak di’ak iha ita-nia kakutak iha futuru ita sei haree nia rezultadu di’ak”. Dehan Nia. Emj8/Emj7

Leave a Reply

Your email address will not be published. Required fields are marked *