SEKoop Asina MoU ho Corpo Da Paz Dezenvolve Kooperativa Rural
Naunil Media (Díli), Kuarta (23/09) ne’e, iha Salaun Akait, Sekretáriu Estadu Kooperativa (SEKoop), Elizário Ferreira, asina Memorandum Of Understanding (Nota de Entendimentu) parseiru Corpu Da Paz husi Ajénsia Amérika atu Dezenvolve Kooperativa husi Komunidade Area Rural iha seitór produtivu.
“Parseiru Corpo Da Paz ajénsia ida husi povu Amerikanu atu oferese nia voluntáriu sira atu servisu voluntáriu ba komunidade liu husi kooperativa. Povu Amerikanu oferese ninia matenek nain sira ne’ebe mak atu servisu voluntáriu, eduka ita nia povu atu hatene prodúz ho kuantidade no kualidade, eduka sira oinsa bele prodúz sustentavel no lori sira to’o merkadu”, Sekretáriu Estadu Kooperativa, Elizário Ferreira, ba jornalista sira hafoin selebra MoU iha Salaun Akait.
Membru Governu konstitusionál da-ualu, Elizário Ferreira, informa Ajénsia Corpo Da Paz la’os deit servisu voluntáriu iha vida negósiu maibe iha mos vida social, ekonómiku no atividade sosial sira seluk atu tulun povu Timor-Leste.
“Assinatura ba oin halo mos memorandu instituisaun, atu kontribui ba ita nia soseidade nia di’ak, la’os dehan atu husu osan ba malu, maibe oinsa atu servisu hamutuk hodi eduka sira ne’ebe mai ho esperensia husi nia rain rasik kona-ba dezenvolvimentu Kooperativa”, tenik Governante ne’e.
Iha fatin hanesan, Diretora Corpo Da Paz iha Timor-Leste, Kavita Pullapilly, esplika objetivu servisu hamutuk atu dezenvolve ekonómia komunidade rurál sira nian.
“Ami servisu hamutuk ho SEKoop, ami nia programa mak dezenvolvimentu Ekónomiku komunitáriu, ami nia voluntáriu servisu hamutuk ho komunidade inkliudu ho kooperativa ba iha komunidade, haree oinsa hasa’e produsaun no sira nia negósiu ka hadi’ak nia kualidade, haree buat sira ne’ebe presija hadi’ak”, hateten Kavita Pullapilly.
Ikus, Nia relata, pesoál voluntáriu husi Corpo Da Paz ho total nain-40, mak sei servisu voluntráriu hamutuk ho Sekretáriu Estadu Kooperativa durante tinan lima hodi ajuda komunidade sira. Leo
