Tebe Sai Sporting 6-3, SLB Laulara Hakat ba Quarto Finais Copa FFTL 2020
Naunil Media (Ermera), Ekipa futebol AD SLB Laulara susesu hakat ba Quartu Finais hafoin hurlele nia ekipa Sporting de Timor ho score 6-3 iha jogu oitavu finais Copa FFTL 2020.
Duelo entre ekipa rua ne’e hala’o iha Estadion Municipal Cafe de Ermera, Sesta (16/10). Iha inísiu jogu parte dahuluk ekipa AD SLB Laulara ne’ebé jogu ho ritmu aas domina bola ho nune’e tama ba iha minutu 23 AD SLB Laulara susesu fura rede Sporting de Timor, liu husi jogador João Pedro muda score ba 1-0.
Golu refere halo ekipa AD SLB Laulara kontinua fo presaun maka’as, nune’e iha minutu 31 Mouzinho de Lima marka tan golu ida hodi hatuur score ba 2-0.
Iha minutu 45 João Pedro hatama tan golu ba daruak hodi muda score ba 3-0, to’o termina jogu parte dahuluk.
Kontinua ba jogu parte daruak, ekipa rua hotu-hotu troka nia jogador hodi halo mudansa ba tatika ho nune’e tama ba iha minutu 47 jogador Mouzinho de Lima marka tan golu ida hodi haboot score ba 4-0.
Sporting de Timor foin hamihis score ba 4-1 iha minutu 55 liu husi jogador Florindo Soares, ho score ne’e jogu kontinua manas liu-tan.
AD SLB Laulara haboot fila-fali score ba 5-1 iha minutu 61 liu husi jogador Mouzinho de Lima.
Liu de’it minutu 1 ka iha minutu 62 Sporting de Timor marka tan golu ida hodi muda hikas score ba 5-2.
Iha minutu 81 Alexandre Ima Keffi marka tan golu ida hodi muda score ba 6-2.
Liu de’it minutu 3 ka iha minutu 84 Sporting de Timor marka tan golu ida hodi muda score ba 6-3 ho score refere to’o termina jogu parte daruak vitória ba ekipa AD SLB Laulara.
Husi rezultadu vitória ne’e lori ekipa AD SLB Laulara hakat ba Quartu Finais Copa FFTL 2020.
Enkuantu ekipa Sporting de Timor tenke elimina husi Copa FFTL tanba iha jogu oitavu finais ne’e ho sistema bota fora ka lakon sai. Dvo
