Tinan 20 Abandona o nia Furak

Fahe Tutan

Naunil Media (Iliomar), Estadu Timor-Leste hamrik nu’udar nasaun demokratiku kuaze tinan 20 ona, maibe Governu lada’uk seriu atu halo investimentu ba potensiál sira iha rai maran, tasi no bé, ne’ebé iha futuru bele garantiha sustentabilidade finanseiru estadu nian.

Dia 10 Fevereiru 2020, ekipa Naunil Media, hala’o viajen naruk ida husi fatin turistiku tasi ibun Timur ba fatin furak Faebere Kassadan, lokalizadu iha fronteira entre Postu Administrativu Iliomar ho Suku Lore postu administrativu Lospalos, Munisipiu Lautem.

Ekipa Naunil Média nain tolu ho kondutór, akompania toos nain area ne’eba nain 2 sai husi uma Suku Iliomar segundu, iha dadersan oras tuku 8:00, tanba dalan át kareta dollar nene’ik hakat liu mota neen foin to’o iha fatin destinasaun Fahebere Kassadan.

Distansia husi postu administrativu iliomar to’o Fahebere Kassadan kuaze kilomentu 20, durante viajen aliende hakur mota, kareta land cruser dollar nene’ik iha ailaran tuan, ne’ebé nakukun bo fresku.

Toos Nain Titu Fernandes, area ida ne’e kuandu estadu konseva didi’ak bele dehan potensiál floresta ida ne’ebé ba futuru atrai turista hadomi ambiente nian.

“hau hanoin ita tenke halai nene’ik maske rai tetuk maibé estrada sei át, ita sei hakur mota barak, ailaran tuan de’it,”dehan toos nain Titu Fernandes, ba ekipa Naunil Media iha kareta laran, segunda, (10/02/2020)

Kuaze oras rua iha dalan ekipa to’o duni iha fatin destinasaun Fahebere Kassadan iha oras tuku 10:00, ekipa tun deskansa iha uma toos nian iha minutu balu, kotinua la’o ain ba tasi ibun.

Husi tasi ibun Fahebere Kassadan, toos nain Titu Fernandes, esplika, rai henek ida ne’e diferenti tanba la’ós mutin maibé ninia kor ne’e kinur osan mean fali, dalan ruma hafoin toos nain sira halo toos deskansa mai hariis ita haree lakan.

“hau lahatene rai henek husi fatin seluk hanesan ne’e ka la’e, más rai henek ida ne’e ita bele dehan koor ne’e kinur emas fali, ami kolen mai haris iha meudia lakan,” Titu Fernandes esplika ba Naunil Media.

Bainhira ekipa Naunil tun haree direitamente rai henek nia luan husi rai maran tama to’o tasi laran naruk laloran nafurin nian kuaze metru 70, ninia naruk husi area Fahebere Kassadan to’o lagoa Betuna besik Kilometru tolu.

Raihenek iha tasi ibun Faebere Kassadan kuandu Governu halo investimentu didiak sei bele atrai turista sira husi rai liur nomós iha rai laran rasik hodi anima sira nia an ho skyboard, sai fatin refresing diak ho laloran bobot de’it.

“ami hein bainhira maka estadu bele halo estrada mai iha fatin ida ne’e para ita nia nai ulun sira mai haree rasik, raihenek ida ne’e ba oin bele atrai turista sira tantu malae no ita timór-oan rasik mai ka la’e,” Titu Fernandes esplika.

Nia afirma, iha rai maran tasi ibun nian mesak ailaran tuan iha okos bele hamos de’it hodi harii uma ki’ikoan para sai fatin deskansa.

“foin lala’is joven sira husi Dili mai atu halo uma, tesik tasi ibun ailaran sira ne’e, sira lamai, nene’ik ami sei halo,”tenik Titu Fernandes.

Ita haree tesik tasi ibun sira iha laran tuan de’it, ita sei latesi aihun sira ne’e más ita bele hamos iha okos sira ne’e harii uma kiikoan para sai fatin deskansa nian ba vizitante sira.

Entretantu husi tasi ibun Faebere Kassadan, iha mos lagoa Betuna, Siwaka no lagoa sira seluk ne’ebé iha laran avo Lafaek, ikan no hafurak liu tan ho niki ne’ebé tara tutan malu to’o besik bé lagoa.

Rai tetuk furak iha Postu Administrativu Iliomar, Munisipiu Lautem ne’e hahú kedas husi komunidade sira nia hela fatin Iradarat tama too Faebere Kassadan no kontinua ba mota fronteira Namalutun entre Iliomar ho Lore kuaze kilometru 18.

Potensiál Faebere Kassadan dada’uk ne’e komunidade postu administrativu Iliomar, husi Suku Iliomar primeiru, Suku Iliomar segundu, Ailebere no Fuat maka aproveita rai ne’e hodi halo aktividade agrikultura hanesan natar, toos, hakiak karau, bibi, manu no animal sira seluk.

Titu mos esplika, area Faebere Kassadan, tempu kolonial Protugues ho Indonézia nian fatin ne’e nu’udar knuk gerileiru nian hodi luta hasoru inimigu sira ba libertasaun rai doben ida ne’e.

“uluk fatin ida ne’e iha tempu rejistensia nu’udar fati kosentrasaun no movimentu gerileru sira hodi halo funu hasoru invazor militar Indonezia nian,”Titu hatete.

Tuir Naunil media observa katak, la’ós deit Raihenek koor kinur osamean ho Lagoa ne’ebé ba futuru sai fatin destinasaun turista ne’e de’it maka hafurak Faebere Kassadan.

Raihenek furak Faebere Kassadan, foto Naunil Media.02 Janeiru

Maibé iha potensial sira seluk iha Faebere Kassadan ne’ebé sei orijin hela hanesan floresta, pekuaria, peskas, Animal fuik, Agrikultura nomós bele sai area investimentu industriais nian.

Kuandu governu iha duni seriedade atu investe ba area potensiál sira ne’e maka iha futuru bele kobre resetas, nune’e hodi garantiha sustentabiliza finanseiru estadu iha futuru.(Fakae)

Leave a Reply

Your email address will not be published.