Kaptura Joven Ida iha Same, Família : PNTL Duun De’it Frederico
Naunil Media (Manufahi), Porta voz, Santiago Fatima Soares, deklara Polísia Nasionál Timor-Leste (PNTL) Munisípiu Manufahi, ekuadra Same la-ho evidensia, maibe família konsidera duun de’it mak kaptura Frederico Fatima Soares.
Deklarasaun liu husi konferensia imprensa, relasiona ho membru PNTL eskuadra Same, Kuarta (21/10) ne’e, kaptura Frederico Fatima Soares, tanba deskonfia uza ID falsu (Facebook) hodi desfama Pe. Sabino Pinto de Sousa Gama.
“Ami familia hakarak hato’o lamentasaun no deklara ba públiku, katak informasaun fó sai iha media ne’e laloós no laiha evidensia forte”, Porta voz, Santiago Fatima Soares, ba jornalista sira liu husi konferensia imprensa iha Bairo Aidahaleu, Aldeia Maneikun, suku Letefoho, Postu Same, Kuarta (28/10).
Tuir Santiago, kapturasaun ba Frederico Fatima Soares ne’e la justu no hatudu aktu inkapasidade PNTL nian ba públiku, tanba la bazeia ba faktus ka evidensia ruma.
“Ami nia oan Frederico Fatima Soares, ho 16 anos de idade, la eskola iha COSAMAR, la halo problema ho Pe. Sabino, la envolve iha atividade movimentu Igreja nian, la hatene osan kona-ba konstrusan Igreja Same, la hatene osan sarani nian no osan eskola nian, no la komprende totalmente termu ne’ebe hakerek hodi desfama Pe. Sabino”, klarifika porta-voz ne’e.
Iha fatin ne’ebé la hanesan, Komandante PNTL Munisípiu Manufahi, Superintendente Joni Viana Das Regras, hateten PNTL iha poder jerál hodi kaptura ema maske deskonfia.
“Iha kodigo prosesu penál artigu 52, katak iha ema ruma ne’ebe deskonfia ka halo ona krime ruma, polísia iha dever atu impede no deskobre krime nia azentia sira, nunee halo medida de kautelar no prosesu tomak hodi enkamina ba iha Ministériu Publiku”, esplika Superintendente Joni Viana, iha knaar Fatin Same.
Kuarta (21/10) ne’e, oras tuku 10:00 otl dader, membru PNTL eskuadra Postu Same kaptura joven Frederico Fatima Soares, 16 anos de idade, tanba deskonfia autor uza ID falsu (Facebook) hodi desfama Pe. Sabino Pinto de Sousa Gama. Nfm
