Ezame Nasionál, Ministru Armindo Fiar Estudante Sira Hetan Rezultadu Di’ak
Naunil Media (Díli), Ministru Edukasaun Joventude Desportu (MEJD), Armindo Maia, hateten maske ho surtu mundial COVID-19, hodi Timor-Leste hapara prosesu apredizajen, maibé fiar katak estudante sira sei hetan rezultadu di’ak iha ezame nasionál.
Ministru Armindo Maia, ba jornalista sira hafoin abertura ezame nasionál, iha eskola Katólika báziku no sekundariu Sagrado Coração de Jesus, Bekora, Segunda (16/11).
“Ha’u espera katak agora buat hotu la’o di’ak. Espera estudante sira fó rezultadu diak iha postus ezame nasionál ba tinan letivu 2020”, hateten membru governu konstitusionál da-ualu ne’e.
“Ohin ha’u mós observasaun katak ita-nia estudante sira nafatin kumpri estadu emerjénsia hodi mantein distansi sosial ba malu, maske ita-nia situasaun COVID-19 redúz ona”, tenik Governante ne’e.
Nia husu estudante sira haka’as-án fó rejultadu di’ak ba iha pontu sira ezame nian hanesan eskola ensinu báziku ba sekundáriu no sekundariu ba nivel universitáriu.
“Hanesan ema fiar nain manten nafatin orasaun ba Maromak atu fó ninia espíritu sabedoria ba imi (estudante) hotu atu imi nia prosesu ezame nasionál tinan letivu 2020 bele determina ho di’ak”. Apela nia. Nel/Emj14.
