Komunidade Suku Macadique iha Viqueque Vasina Ona AstraZeneca

Fahe Tutan

Naunil Medi (Viqueque), Diretór Postu Saúde Macadique Placido da Silva,  hatutan komunidade suku Macadique koopera hamutuk ho pesoal saúde sira atu hamutuk hodi kombate pandemia Covid-19 liu-husi simu vasinasaun AstraZeneca.

“Populasaun Suku Macadique prontu koopera ho ami pesoal saúde, tanba sira hatene ona pandemia Covid-19,  nia da’et lalais, entaun sira simu vasina ne’e hodi hasa’e sira nia imunidade hodi hasoru moras ne’e”, Hateten  Diretór Postu Saúde Macadique Placido da Silva ba jornalista iha Aldeia Osso-lari, suku Macadique, postu Uatulari, munisípiu Viqueque, foin lailais ne’e.

Nia hatutan, sira nafatin fó informasaun liu-husi autoridade lokal sira, atu halo kooperasaun di’ak hodi bele partisipa iha vasinasaun.

“Ami pesoal saúde sira nafatin fó informasaun ba populasaun sira liu-husi xefí aldeia, Xefí  suku sira, entaun populasaun komprende no koopera ho ami hodi partisipa iha vasina ne’e barak”, Nia deklara.

Responsavel ne’e salienta, hahú vasina iha loron 5 fulan Jullu tó ohin loron populasaun  mais ou menus 383 maka simu ona vasina, maibé  iha populasaun husi aldeia balun ne’ebé maka seidauk hetan vasina.

Iha fatin hanesan, komunidade Afonso da Silva salienta, informasaun iha media sosiál dalaruma inventa de’it, maibé vasina ne’e atu hasa’e ita-nia imunidade, hodi prevene a’an husi moras Covid-19.

“Tuir ha’u nia observasaun iha media sosiál  dalaruma ko’alia barak konaba vasina balun dehan hola malu oan laiha, dalaruma ita-nia moris lanaruk, maibé ha’u rasik haree iha situasaun mundial Nasoen nian laiha, buat sira ne’e inventa de’it,  vasinasaun ne’e halo di’ak ba ita saúde, salva ita-nia moris husi Covid-19, entaun agora ema barak maka tuir ona vasina”, Dehan Afonso molok simu vasina AZ primeiru Doze. Rit

Leave a Reply

Your email address will not be published. Required fields are marked *