Hahú 1 Agostu Tó 15 Setembru Juiz Sira Sei Ferias

Naunil Media (Díli), Prezidenti Tribunal Rekursu (PTR) Deolindo dos Santos,  Hateten hahú loron 1 fulan Agostu tó loron 15 fuan Setembru tinan 2021, Juiz no ofisiál justisa sira sei ferias judisial durante loron 25 nia laran,  maibé prosesu ba kazu urjenti la’o nafatin.

Asuntu ne’e deklara Prezidenti Tribunal Rekursus  (PTR) Deolindo dos Santos ba jornalista sira hafoin enkontru ho Prezidenti Repúblika (PR) Francisco Guterres “Lú Olo” iha palásiu Prezidenti Nicolau Lobato Bairru Pite,  tersa (27/07).

“Ohin ha’u mai hasoru Prezidenti Repúblika antes tama iha ferias judisial hahú loron  1 fulan Agostu tó loron 15 fulan Setembru,  entaun ha’u mai ko’alia ho Prezidenti Repúblika mais ou menus informasaun ruma kona-bá servisu tribunal nian,  ne’ebé ke ita la’o durante ne’e mak kona-bá prosesu nian la’o hela, no ami ható ba PR katak ami la’o normál depois molok serka sanitária”. Dehan PTR Deolindo dos Santos.

PTR Deolindo hatutan,  kona-bá servisu jestaun balun tribunal nian,  ne’ebé ke la’o hela no pontu prinsipal liu mak ható ba PR katak hahú loron 1 fulan Agostu tó loron 15  fulan Setembru,  tribunal sira sei funsiona parsialmente tanba feriadu judisial.

“Signifika katak iha tempu ida ne’e Juiz no ofisiál justisa sira iha direitu ferias ba  loron25 nia laran,  tanba sei ba ferias entaun tribunal sei funsiona de’it ba buat prosesu urjente ne’ebé ke tama iha tribunal”, tenik Deolindo dos Santos.

Deolindo hateten,  entaun ida ne’e atu dehan de’it katak mesmu ke Juiz no ofisiál justisa sei ba ferias prokurador, defensor mas tribunal funsiona ho forma ne’ebé ke minimu, atende de’it bá kazu sira ne’ebé urjenti ida ne’e mak sei akontese.

Aleinde ne’e nia mós ható ba PR kona-bá ezekusaun orsamentu ne’ebé iha fundu infrastrutura no ba konstrusaun Tribunal Distrital Díli nian, Dehan nia.

“Paralende ha’u mós ható ba prezidente Repúblika (PR) katak iha prosesu balun ne’ebé ita la’o ona ezekusaun orsamentu 2020 nian,  ne’ebé ke iha fundu infrastrutura ne’e ita la’o iha buat balun ona mak konstrusaun ba Tribunal Distrital Díli nian, ne’ebé ita atinji ona 25%”, Katak nia

Nia dehan, Tribunal Rekursu  esforsu para atu ezekusaun orsamentu ba Obra ida ne’e,  bele hotu iha tinan ida ne’e nian para ba iha tinan oin nian ne’e preve fali orsamentu ba Obra ne’e nafatin,  mas ho prosesu ne’ebé ke diferente ona atu kontinua tó hotu.

Iha biban ne’e PrezidentiRepúblika Francisco Guterres “Lú Olo” mós husu ba tribunal katak mesmu ferias judisial, mas tenke asegura nafatin servisu urjensia sira para atu sidadaun sira ne’ebé buka justisa karik presiza atendementu nafatin husi tribunal sira.

Nune’e PTR mós ható ba PR katak kestaun ida ne’e sei asegura nafatin,  tanba mapa ferias Juiz sira nian no ofisiál justisa nian ne’e konsellu mak aprova, entaun signifika katak mesmu ferias mas servisu ne’ebé ke urjenti ne’e la’o nafatin. *Jos