Eis-Membru PM Manuel: Ha’u Rasik Mak Hakarak Sai Ba Vida Sivil
Naunil Media (Díli), Eis-Segundu Sarjentu Polísia Milítar (PM), Manuel João Batista alias ‘Manecas’ durante ne’e kontribuisaun ba forsa milítar hahú husi funu laran to’o transférensia ba Falintil forsa Defeza Timor-Leste F-FDTL hanesan fundadór, iha tinan 2007 nia muda ba Polísia Milítar (PM), iha sexta ne’e (11/12) deside an sai husi PM hakarak ba vida sivil.
Eis-Segundu Sarjentu PM, Manuel João Batista alias ‘Manecas’ ba jornalista sira, iha semónia hasai nia-atributu iha edifisiu PM, Kintal Boot, Sesta (11/12).
“Ha’u rasik mak desidi an hakarak sai husi PM, tamba iha situasaun balu obriga ha’u tenki sai la’ós komandu F-FDTL mak haruka ha’u sai. Maibé ha’u-nia inisiativa rasik no ha’u regina an husi F-FDTL la’ós signifika ha’u sai ba iha fatin seluk. Ha’u prontu kualker tempu wainhira komandu F-FDTL presija ha’u-nia forsa, ispiritu hanesan milítar ida ha’u prontu koopera”, dehan eis membru PM Manuel.
Nia hatutan, “ha’u ba fali vida polítiku, ha’u hanesan aktual Vise Presidenti Partidu Os Verdes de Timor no partidu ida ne’e foin mak hamrik iha tempu badak atu kompleta hanesan nasaun ida demokrásia nia laran”.
Iha fatin hanesan Komandante Unidade PM, Maijór Infantaria Abel da Costa Xavier ‘Niki’, hateten membru PM ida regina-an ba vida sivil hodi partisipa fali iha vida polítika.
“La’ós ami mak duni sai, nia rasik mak desidi an ba vida sivil, nia rasik mak halo rekerementu hatama ba Xefe Estadu Maiór F-FDTL Maiór Jenerál, Maijór Jeneral Lere Anan Timor”, Komadante PM ne’e klarifika.
Komandante Niki, dehan “Ami hamutuk mak harii, Manecas la’ós mai aproveita de’it lae. Nia (Manecas) mós ema fundadór ida, nia aman mate ba rai ida ne’e”.
Antes ne’e númeru unidade PM totál nain 158, maibé agora Manecas sai ba vida sivil ho hamutuk nain 157. Flo/Ipe.
