Hospital Referal Maliana Krize Ai-Moruk
Naunil Media (Díli), Bankada Parlamentar Kongresu Nasionál Rekonstrusaun Timorense (CNRT-Sigla Português), Deputada Virgina Ana Belo, hateten Hospital Referal iha Maliana, Munisípiu Bobonaro, dadaun ne’e falta ai-moruk Paracetamol no seluk-tan.
“La’os deit Ai-moruk Paracetamol, maibe Ai-moruk sira seluk mos la iha ona. Pasiente sira kuandu hafoin konsulta iha doutor, la iha ai-moruk ba sira (pasiente), tanba hotu ona”, Deputada Virgina Ana Belo, deklara liu husi plenaria, Segunda (18/01).
Nia hatutan, “Tuir hau rona informasaun ruma, katak Servisun Autonomu Medikamentus e Ekipamentus Saúde (SAMES) mos dadaun ne’e ai-moruk ba moras baibain laiha ona, só iha de’it mak Ai-moruk ba COVID-19 deit”.
Reprezentante povu iha Uma Fukun Parlamentu Nasionál ne’e argumenta, dadaun ne’e tempu udan, moras dengue ho malaria mos barak kauza husi susuk, no bele hamate populasaun, tanba ne’e husu ba Ministériu ne’ebe tutela atu fó atensaun sériu.
“Governu konstituisional da-ualu liu husi Ministériu Saúde, tenke tau atensaun sériu, tamba moras ne’e perigu no sai ameasa ba vida ema nian”, tenik Deputadan Ne’e. Latu
