Lere : Rekursu Umanu Sai Save Ba Dezenvolvimentu Forsa Armada
Naunil Media (Díli), Xefe Estadu Maior Jenerál FALINTIL-FDTL Majór Jenerál, Lere Anan Timur, hateten atu dezenvolve forsa armada presiza kria kondisaun no tenke kapasita rekursu umanu nune’e sai milítar ne’ebé di’ak.
Eis-gerileiru Rejistensia Komandante Rejiaun Um Ponta Leste, Lere Anan, ba jornalista sira hafoin sorumutuk semanal ho Prezidente Repúblika (PR), Franscisco Guterres ‘Lú Olo’, iha Palásiu Prezidensiál Nicolau Lobato, Bairru-Pité, Kuarta (10/02).
“Atu dezenvolve forsa armada presija kondisaun, primeiru kondisaun mak rekursu umanus no tenke kapasita ita-nia rekursu umanu husi ofisais to’o soldadu para atu sai milítar ne’ebé di’ak”, informa veteran 24 anos ne’e.
Tuir Lere, bainhira rekursu umanu komesa kapasita ona, presija mós meus material, infraestutura, lojistika no transporte.
“Kona-ba rekursu umanu la’ós dehan di’ak liu, maibé ha’u nu’udar sira-nia komandante, ha’u dehan iha dezenvolvimentu avansa di’ak konaba rekursu umanu, kapasitasaun ofisais sira tuir formasaun iha rai liur, iha rai laran, liu-liu Institutu Defeza Nasonál (IDN)”, dehan Lere.
Nia hatutan, Ministériu Defeza mak kaer osan tanba ne’e mak forsa armada hein deit, se defeza fó osan forsa armada ejekuta.
“Se Ministériu Defeza fó osan uituan, pasensia ami simu de’it. Ministériu Defeza mak fó osan barak ne’e ha’u lafiar, tanba ha’u komanda ona Fórsa Armada durante tinan rua-nolu (20) ona”, tenik Lere.
Ikus Nia, dehan átual Ministru Defeza ne’e nia kuiñese F-FDTL husi fu’uk to’o nia-ain kukun nian, kuiñese moos, la-relata mós ministru hatene hela. Pau/Emj6/Emj2
