Lere : Komunidade Lalika Provoka F-FDTL-PNTL

Naunil Media (Díli), Xefe Estadu Maiór Jenerál FALINTIL-FDTL, Majór Jenerál Lere Anan Timur, hateten komunidade lalika provoka FALINTIL-FDTL no PNTL, tanba sira  nian misaun atu garante estabilidade.

Eis-gerileiru Rejistensia Komandante Rejiaun Um Ponta Leste, Lere Anan Timur, ba jornalista sira hafoin sorumutuk semanal ho Prezidente Repúblika (PR), Franscisco Guterres ‘Lú Olo’, iha Palásiu Prezidensiál Nicolau Lobato, Bairru-Pité, Kuarta (10/02).

“Ha’u hakarak eskalarese ba ita-nia komunidade sira, katak F-FDTL no PNTL la’ós bulak baku ema arbiru de’it. Kazu ida ne’e foin daudauk ha’u simu ita-nia komunidade sira dehan katak ami-nia forsa ida baku joven ida no sira kaer. Depois ita-nia komunidade balu kondena ita-nia forsa ne’e sala, maibé ha’u seidauk kondena ha’u-nia soldadu ida, ha’u haree prosesu investigasaun   sira ne’e mak ita bele hatene nia ne’e sala ka loos”, tenik Majór Jenerál, Lere Anan Timur.

Lere Anan afirma, tenke hatene espilikasaun tanba saida mak baku labele akuza fali forsa ho polísia sira mak sai vítima hela de’it.

“Tanba ne’e mak ha’u husu ba komunidade sira labele provoka forsa no polísia, foin  lalais ne’e,  komunidade balun halo kanek menbru polísia iha rotunda, tanba saida mak tenke hakanek ita-nia polísia, polísia kumpri ninian misaun”, tenik   Lere.  

Lere apela, komunidade lalika provoka F-FDTL no PNTL tanba sira halo sira nian misaun servisu. Pau/Emj6/Emj2