KOMJER: Aprezenta Kazu Baucau, Maliana Ba PR “Lú-Olo”
Naunil Media (Díli), Komandante Geral Polísia Nasionál Timor-Leste (PNTL), Komisariu Faustino da Costa, Hateten ohin mai aprezenta situasaun semana ida ne’e nian liuliu kazu Baucau, Maliana no Laklubar ne’ebé dadaun ne’e polísia sei atende hela.
Komisariu ható lia hirak ne’e ba jornalista hafoin remata enkontru semanal ho Prezidente Repúblika (PR) Francisco Guterres “Lú-Olo” iha palásiu Prezidente Nicolau Lobato Bairru Pite, kinta (14/10).
“Enkontru semanal ne’ebé halo ho Prezidente Repúblika aprezenta situasaun semana ida nian ne’ebé ami aktualiza liu-liu kazu sira balun ita bo’ot sira akompaña karik kazu Baucau ninian kazu Maliana nian hanesan mós akontesementu hanesan kazu iha Laklubar ne’ebé agora polísia mós atende ka atua hela”, Dehan Komisariu Faustino da Costa.
Komisariu hatutan durante iha semana ida ne’e nia laran polísia nasionál Timor-Leste rezista kazu hamutuk 32 maibé kazu ne’ebé boot liu ne’e mak kazu Baucau no Maliana.
“Ita iha 32 kazus mas atu dehan de’it ne’ebé PNTL rezista maibé hanesan ohin ha’u dehan katak kazu ne’ebé boot ne’e mak kazu Baucau no Maliana ninian”, Tenik Komisariu Faustino da Costa
Faustino hateten, kazu Baucau prosesu la’o hela autór sira polísia detein ona no vitima balun mós iha ona ospital, no sira mesak família.
“Kazu Baucau hanoin prosesu ne’e la’o hela, vitima iha ospital no autór sira ne’e mós polísia detein prosesu la’o hela, vitima ida hanesan ne’e mak nia kondisaun saida, mas enprinsipiu sira mesak familia de’it dala ida tan katak sira mai husi grupu artemasiais”, Nia esplika
KOMJER esplika iha semana ida nia nia laran polísia nasionál Timor-Leste mós nafatin halo kapturasaun ba sidadaun sira ne’ebé gosta lao ilegal iha fronteira
“Polísia Nasionál Timor-Leste sei nafatin kaptura sidadaun Timor-oan ne’ebé gosta ilegal iha semana ida ne’e nia laran ne’e ita kaer ema nain neen, husi nain neen ne’e nain lima ne’ebé ke gosta negósiu ilegal entaun sira ne’e agora prosesu hotu kuarentena para kontinua sira nia prosesu.
Iha enkontru ne’e Prezidente Repúblika mós ható ba KOMJER katak kontinua prepara aan kria kondisaun oinsá para asegura membru sira nia servisu, tanba durante ne’e xefí estadu mós akompaña katak kestaun rekursu umanu membru sira nian mós hanesan parte ida. Jos
