Sporting Halakon FC Aitana ho Score 3-1
Naunil Media (Díli), Ekipa Sporting de Timor halakon nia ekipa adversariu FC Aitana ho escore 3-1, iha Jogu kontinuasaun Copa FFTL 2020, pool C.
Jogu entre ekipa Sporting de Timor kontra Fc Aitana ne’e hala’o iha Estadion Municipal Dili, Sábadu (03/10.
Inísiu jogu ekipa rua ne’e hotu-hotu hatudu jogu furak liu husi kontra-atake husi tekniku ida-dak nian, jogu la’o ba iha minutu 12 sorti di’ak ba ekipa FC Aitana konsege marka uluk golu husi suta livre liu husi jogadór, Jilson dos santos ho númeru kamizola 9, hodi muda score ba 1-0.
Hela ho escore 1-0 halo ekipa Sporting hahu halo kontra-atake maka’as iha jogu ne’e, nune’e minutu 21 hosi jogadór marito dos Santos marka golu responde halo balansu score 1-1.
Tama ba iha minutu 31 sorti aat ba ekipa FC Aitana tenke hasai nia jogador Jilson dos Santos hosi kampu hafoin simu kartaun kinur dala rua Arbitru, no jogu primeiru termina mantein score 1-1.
Deskansa tiha minutu balun, jogu kontinua ba iha segundu parte, Sporting de Timor hahu halo ritmu jogu hodi fo presaun ba ekipa Aitana FC, minutu 51 oportunidade ba jogador Marito dos Santos marka tan golu ida ba rede Aitana FC, hodi muda score ba 2-1.
Hosi jogu ne’e ekipa Aitana kontinua halo esrforsu nune’e tama ba iha minutu 68, Marito dos Santus marka tan golu ida, hodi haboot liu-tan score ba 3-1. Rezultadu ne’e la iha tan golu ruma to’o jogu termina, nune vitoria ba Sporting Timor. Dvo/Emj7
