Edinho Apela Suku 76 Seidauk Asesu Eletrisidade, Impede Husi Governu
Naunil Media (Díli), Portavoz Konpañia EDZORES83 Edinho Da Rocha, apela total suku hamutuk 76 ne’ebé mak seidauk asessu ba eletrisidade no liga Programa Eletrifikasaun Nasionál (PEN) la’ós kulpa veteranu no Empreza lokál sira, maibé impedementu hosi VIII Governu liuhusi Ministériu Obras Públiku (MOP).
Portavoz Konpañia EDZORES83 Edinho Da Rocha ba jonalista sira liuhusi komunidadu impresa, iha Kafé Lete Foho, Pantai Kelapa, Domingu (28/02).
“Ami atu apela suku 76 ne’ebé mak seidauk asessu ba eletrisidade, liga iha Programa Eletrifikasaun Nasional (PEN) ne’e la’ós kulpa hosi veteranu no emprezariu lokál sira, maibé prosesu sira ne’e hotu hetan hela impedementu husi VIII Governu liu-liu MOP”, Edinho informa.
Tuir Edinho involvimentu veteranu, oan kiak, feto faluk, juventude resisténsia no emprezariu lokál sira iha projetu liña eletrisidade, mosu wainhira, MOP liuhusi Sekretariu Estadu Eletrisidade, diresaun Komisaun Gestaun no Implementasaun (CGI -EDTL) iha tinan 2010-2011, forma ekipa veteranos sira hodi rekolla dadus ba PEN nian.
Iha Partisipasaun entidades sira iha projetu liña eletrisidade no PEN mak hamosu dekretu lei númeru 40/2012, 5 Setembru, ne’ebé inspira husi Konstituisaun Republika Demokratika Timor-Leste (KRDTL).
Iha KRDTL artigu 115 numeru 1, aliñea (n) dehan, fó tulun ba inisiativa ekonómiku privadu hodi fó legalidade ba veteranu, oan kiak, feto faluk, juventude resisténsia no emprezariu lokál sira hodi sukat terenu ne’ebé besik sira-nia hela fatin hodi mai hatama sira nia dadus iha sistema database EDTL nian no hosi ninia implementasaun konsege atinji ona 85% iha teritóriu nasionál Timor-Leste.
“Obra ne’e rasik fó ona rezultadu ba Timor tomak povu asesu ba naroman, maibé ami balu ne’ebé hein hela obra hosi 15% ne’e hein atu mate de’it ona, balun bankrota, labele selu tusan, balun tenki lakon propriedade, buat sira ne’e hotu akontese tamba estadu la konsege kumpri obrigasaun tuir dekretu lei N° 40/2012, 5 setembru”, Edinho Subliña.
Nia afirma, tamba sá maka durante ne’e hein hela restu 15% tenki tau fali tenderizasaun, hodi prejudika tiha prosesu baseia ba dekretu lei Númeru 40/2012, 5 setembro, signifika katak molok dekretu lei no 41/2016, 5 Outubru mosu dadus hotu rejistu ona iha sistema database EDTL nian.
Tanba ne’e nia dehan, ohin veteranu, feto faluk, oan kiak, juventude rejisténsia no emprezariu lokál sira hotu hakarak ezije sira-nia direitu ba VIII Governo konstitusionál.
Portavoz ne’e husu, Primeiru Ministru Taur Matan Ruak tau konsiderasaun ba lista kompañia lokál ne’ebé involve husi veteranu, oan kiak, feto faluk, no juventude resisténsia sira, ne’ebé rejistu tiha ona iha CGI-EDT nian.
“Ami husu ba MOP no EDTL, E.P. tetu no análiza didiak molok foti desizaun kona-ba tenderizasaun nian, atu labele prejudika fali ami emprezariu lokál hirak ne’ebé maka lori ona prosesu tuir dalan legal, dekreitu lei n 40/2012, 5 Setembru, ne’ebé lori prosesu ne’e hahú hosi Aldeia sira mai to’o hetan despasu hosi governante anterior Arg. Januario Pereira no ami-nia kompania nian naran tama ona iha sistema database CGI EDTL nian”. Nia sujere.
Nia sujere, membru Governu sira atu labele aplika sistema balu iha VIII Governu ne’e minimiza fali, konfiansa ba maun bo’ot veteranu ne’ebé oras ne’e kaer hela ukun iha rai doben ida ne’e Presidente da Repúblika no Primeiru Ministru.
“Se karik ami-nia ezijensia sira ne’ebé ami ne’e, parte governu la tau konsirederasaun maka ami sei mobiliza 76 sukus ne’ebé seidauk assesu ba iha liña eletrisidade ninia komunidade hodi boikota atividade implementasaun obra Eletrisidade sira ne’ebé Governu deside ba tenderizasaun”. nia hakturi.
Nia dehan, rezeita totál ba polítika VIII Governu Konstitusional RDTL nian ne’ebé maka hakarak atu lori PEN ne’e ba iha tenderizasaun, sei Ia simu kualker dezisaun tamba sistema ne’e hanesan aktus diskriminasaun la fó oportunidade ba emprezariu lokál sira hodi partisipa iha atividade dezenvolvimentu nasionál.
Ikus liu nia husu, MOP no Presidente Exekutivu EDTL,E.P. katak foti dezisaun ne’ebé justu nune’e bele solusiona situsaun refere. Ipe
