MEJD Reativa Programa Eskola Ba Uma no Tele-Eskola Ba Sekundariu Iha TL
Naunil Media (Díli), Relasiona ho kazu covid-19 ne’ebé kada loron númeru kontinua aumenta Ministru Edukasaun Joventude no Desportu (MEJD), Armindo Maia ofisialmente reativa fali programa eskola ba uma no Tele-eskola ba estudante 3º siklu husi ensinu Sekundariu Gerál no eskola Tékniku vokasionál iha Timor-Leste (TL).
“Iha tinan kotuk, bainhira ita halo lansamentu programa eskola ba uma, ita lansa programa distansia ba dahuluk iha Timor-Leste, liu-husi Televisaun, Radio no Plataforma Pasaporte, aprendizajen iha internet, partispante Diretor Nasionál School iha Timor-Leste,Diretor jerál”, Dehan Armindo ba jornalista sira, iha Salaun MEJD, Vila verde, Tersa (31/03).
Ministru ne’e hatutan, tanba Covid-19 ho nia númeru aumenta ba bei-beik, entaun iha posibilidade sei taka prosesu aprendizagem balun iha tempu naruk, maibé tenke garantia distansia sosial iha situasaun ida ne’e nia laran.
“Ohin iha Parlamentu Nasional, Deputada sira, sei levanta no husu ba Ministériu Edukasaun no sira seluk, atu bele garantia prosesu aprendizajen oin mai. Maibé agora ita haree kazu Covid-19 aumenta ba bebeik, tanba ne’e iha posibilidade sei taka eskola balun iha tempu naruk, atu garantia Ensinu aprendizajem kontinua nafatin, maibé ita tenki garantia nafatin oportunidade hodi halo distansia sosial iha situasaun difisil”, Armido esplika.
Membru Governu ne’e haktuir, iha Nasaun Demokrátiku ne’e, maske hasoru dezafius barak, maibé prosesu aprendizajem posiviel tebes. tanba konsege kompleta tan Matéria balun ba eskola refere.
“Maske dezafiu oi-oin hanesan iha kolektividade no asesu, maibé ita-nia estudantes no Mestri sira ne’ebé maka uza plataforma hirak ne’e, hatudu katak, prosesu aprendizagem sira ne’e posivel tebes iha Timor-Leste. No Matéria sira ne’ebé lansa ona iha tinan kotuk, ba Ensinu Basiku primeiru siklu no segundu siklu, episodiu neen-nulu-resin-walu(68), ohin ita konsege kompleta tan matéria ba Ensinu Basiku 3º siklu, Ensinu Sekundáriu Gerál no Ensinu Tékniku Vokasionál, maske seidauk hotu”. Ministru ne’e deklara.
Nia parte, husu apresiasaun ba Media Nasionál sira, hodi transmite nafatin matéria sira ne’e.
“Ba parte hotu liu-liu ba media Nasionál Televizaun no Radio, ita-nia kompaña Telekomunikasaun tolu no iha Timor-Leste Ministru Eduksaun joventude no Desporto, hakarak hato’o apresiasaun bo’ot tebes, no husu nafatin ita hotu nia apoiasaun ba kanaliza hodi fó sai matária sira nee”, tenik nia. Leo
