Governu Apoia Nesesidade Bázika Ba Vítima Dezastre Naturál Uma Ka’in 41 Iha Manufahi

Fahe Tutan

Naunil Media (Manufahi), Kinta  (08/04) ne’e, Administradór munisípiu Manufahi Arantes Isaac Sarmento informa, governu fó apoia nesesidade bázika ba vítima dezastre natural hamutuk  umaka’in 41 iha munisípiu Manufahi. 

Tuir Arantes komunidade afeta uma ka’in 41 ne’ebé anin sobu tanba akontese udan no anin bo’ot iha loron 01  Abríl foin lalais, rezulta komunidade nian umakain 13 mak hetan estragu totál, no uma 28 maka hetan estragu kamán.

“Akontesementu dezastre ne’e ekipa verifikasaun to’o kedas fatin akontesementu halo kedas verifikasaun hodi fó apoiu emerjénsia, no apoiu emerjénsia ne’e hanesan, fós superme biskuit no sasán sira seluk tan, hanesan apoiu emerjénsia atu rekopera de’it situasaun ne’ebé komunidade sira infrenta”, dehan   Arantes ba jornalista,   iha postu antigu Same,  kinta ne’e.

Adiministradór Arantes husu,  komunidade sira atu prevene-an husi dezastre naturál, liu-liu komunidade sira presisa tesi-ai ne’ebé fó ameasa atu nune’e bele hases-an husi fatin ne’ebé risku ba rai monu no besik mota ibun sira.

Iha fatin hanesan vítima dezastre Albertino Barros, husi Aldeia Riatu suku Daisua postu administrativu Same haktuir,“Ha’u-nia  uma hetan estragu totál tanba anin sobu, tanba ne’e vitima uma ka’in ho totál família na’in 7 ne’e provizóri hela ho viziñu sira-nia uma, tanba ne’e husu governu atu apoiu materiál kontruksaun hodi harí hikas fali ami-nia uma”.

Entretantu dadus  dezastre naturál ne’e, sei kanaliza ba governu sentrál hodi buka solusaun ba vítima dezastre naturál hela fatin ne’ebé   hetan estragu husi anin bo’ot iha munisípiu Manufahi. Nfm

Leave a Reply

Your email address will not be published. Required fields are marked *