Rui: Populasun Labele Tauk Ba Vasina Covid-19
Naunil Media (Díli), Porta voz Koordenador Forsa-Tarefa ba Prevensaun no Mitigasaun surtu Covid-19 Dr. Rui Maria de Araújo, husu populasaun sira labele tauk simu vasinasaun ai-moruk AstraZeneca ne’e ba prevensaun covid-19 nian hodi reforsa imunidade ema nian isin.
“Ha’u husu ba povu tomak lalika tauk vasina. Hanesan mós lori ita-nia oan sira ba vasina saranpu no epatites nian. Ha’u hanesan privelezu ida simu uluk vasina, liu husi ida ne’e hato’o ba populasaun tomak lapresiza tauk demais ba vasina, seguru no bele reforsa ita-nia isin atu bele rejeita kontra infeksaun virus”, Porta voz Koordenador Forsa-Tarefa ba Prevensaun no Mitigasaun surtu Covid-19 Dr. Rui Maria de Araújo ba jornalista sira hafoin ba lansamentu vasina COVAX, iha hospital Bairru Formoza, kurta (07/04).
Dr. Rui hatutan, populasaun kolabora nafatin kipa saúde sira la bele daet moras Covid-19 ne’e husi ida ema seluk, hein to’o vasina mai barak bele vasina populasaun tomak.
Alende ne’e Dr. Rui hateten, husi pontu de vista prevensaun ba mitigasaun Covid-19 infelizmente mosu inundasaun ne’e la ajuda, tanba ne’e provoka ema barak mak lakon sira uma hela fatin. Husi Inundasaun ne’e hodi difikulta inisiativa halo prevensaun ba populasaun situasaun sosia ekonómiku maibe keta haluhan virus ne’e sei iha nafatin.
“Akontese inundasaun ekipa visilansia hahú halo swab ba sira afetadu komesa ona husi loron 5 to’o ohin maibe iha sentru balun afetadu sira barak mak seidauk interese kolabora, liu-liu sira mai husi munisípiu. Iha kazu barak nafatin kolabora ekipa visilansia foti amostra halo test laboratorium hodi hatene positivu ka Lae”. Rui informa
“Ita labele inpoen nafatin ema hodi sai husi Díli, karik ema la iha meus atu moris iha ne’e labele obriga tanba ne’e hau dehan infelizmente inundasaun ne’e la ajuda. Maibe, esforsu nafatin prevene mitigasaun Covid-19”. tenik Dr. Rui.
Nia husu, ekipa konjunta sira iha munisípiu nafatin matan moris neon nain halo test swab no apela mós ba ema hotu iha munisípiu, mak detetadu pozitivu tenke kolabora autoridade saúde sira. Nune’e virus labele daet ba ema seluk iha família laran no ba komunidade sira seluk.Ipe