Dezastre Naturais; Espoza PR Husu Autoridade Lokál Serbisu Makas Rekolla Dadus
Naunil Media (Dili), Espoza Prezidente Repúblika Cidalia Nobre Mouzinho Guterres Lopes husu ba autoridade lokal sira atu servisu makas hodi rekolla dadus kona-ba komunidade sira ne’ebé mak durante loron hirak liu-bá afeita ba Dezastre Naturais.
Espoza PR deklara lia hirak ne’e bainhira hala’o vizita ba vitima Inundasaun iha merkadu Fatumeta Aldeia 5 Outubru Suku Bairu Pite postu administrativu Dom Aleixo, Sabadu, (10/04/2021).
“Ami nia vizita ida ne’e hanesan ohin ha’u ko’alia ho xefi suku ho xefi aldeia sira tenke servisu makas. Ita hatene katak komunidade barak mak afetadu entaun autoridade lokal sira labele iha fatin de’it maibé tenke la’o ba to’o iha nia komunidade sira afetadu, hodi foti dadus entrega ba parte relevante”dehan espoza PR
Espoza PR ne’e deklara prezensa autoridade lokal nian importante iha tempu difisil hanesan ne’e hodi tau matan ba nia populasaun sira.
“Ami nia prezensa, apoiu direta fo tulun ai-han ba família sira para aguenta ba loron ida rua nian,”tenik espoza.
Inan ba nasaun ne’e mós hatutan ba maluk vulneravel liu, hanesan defisiensia, inan ferik katuas sira, ne’ebé mak presiza autoridade sira tenke servisu makas.
“Iha Gabineti tantu prezidente repúblika ninian no mós husi espoza ninian prontu para simu informasaun hodi hein informasaun husi autoridade sira,” nia hatutan.
Iha fatin hanesan xefi aldeia 5 De Outubru Orlando Da Costa hatutan aldeia refere nia-foti ona dadus lubuk ida entrega ona ba gabinete espoza nune dadaun ne’e balun hetan ona apoiu.
“Familia ne’ebé mak hetan estragus, ami foti ona dadus hato’o hotu ona ba parte relevante,nune agora komunidade afetadus sira hein de’it bainhira mak sira resposta mai,” dehan autoridade lokal ne’e.
Aldeia 5 de Outubru Suku Bairu Pite postu administrativu Dom Aleixo iha Membru familia hamutuk 1053 no totál uma kain hamutuk 257. husi total ne’e komunidade ne’ebé mak afeita ba dezastre naturais hamutuk 46 no ida ne’ebé mak hetan estragus totál hamutuk uma kain lima 5. Jos
