SEKOMS Enkoraja Jornalista Frontline Sira, Simu Vasinasaun COVID-19
Naunil Media (Dili), Sekretáriu Estadu ba Komunikasaun Sosiál, (SECOMS) Merício Juvinal dos Reis “AKARA”, husu ba jornalista sira ne’ebé durante ne’e serbisu iha liña oin atu simu vasinasaun, ba prevensaun Covid-19.
Membru oitavú governu konstituisional hato’o liahirak ne’e, hafoin halo vasinasaun COVID-19 ba media frontline sira, segunda loron 19 fulan-abril, tinan 2021, iha edifisiu SEKOMS, Palásiu Governu, Dili.
“Media sira ne’ebé servisu iha área informasaun atu hetan vasinasaun nune’e bele kontribui hodi liberta Timor-Leste husi COVID-19. Ha’u espera ita hotu ne’ebé servisu iha media, tenke iha konsiénsia hodi fó ezemplu ba sidadaun sira seluk nune’e bele rezolve problema COVID-19, no dalan di’ak liu mak prevene an liu husi Vasinasaun hodi kontra COVID-19” tenik “AKARA”.
Ezekutivu ne’e hateten, Governu iha polítika ida sidadaun hotu iha direitu hanesan, governu hakarak fasilita no proteje sidadaun hotu-hotu no halo kolaborasaun ho parseiru sira hodi implementa prosesu vasinasaun.
” Husu sidadaun hotu atu fó apoiu ba ekipa mediku sira tanba iha objetivu ida deit, fasilita sidadaun hotu liuliu frontline sira iha momentu agora hodi hetan vasinasaun” nia hatutan.
Iha programa vasinasaun COVID-19 ne’e, kolaborasaun SEKOMS ho Ministériu Saúde hala’o vasina COVID-19, ba Jornalista Frontline sira. *NLo
