Akademista UNTL Konsidera Injustisa Bo’ot Kuandu Halo Uma Luxu ba Deputadu Sira

Naunil Media (Díli), Akademista Universidade Nasionál Timor-Lorosa’e (UNTL) Julio Alarico, hateten injustisa bo’o kuandu halo uma luxu ba deputadu sira, tanba dadaun ne’e povu sei iha hela moris susar.

“Halo tan uma ba sira (deputadu/a), ne’e sira mak goja liu ona iha rai ida ne’e”, Akademista UNTL, Julio Alarico, ba Naunil Media iha nia kna’ar fatin Kampus Lama, Kaikoli, Segunda (01/09). 

Tuir Nia, deputadu/a sira nu’udár reprezentante povu nian iha Uma Fukun Parlamentu Nasionál tenki terus hanesan ho povu, tanba dadaun ne’e povu sei moris iha terus, sei halerik hela ba dezenvolvimentu infraestrutura bázika, bee moos, eletrisidade, Estrada, saude no edukasaun.

“Ba ha’u kuandu reprezentate povu, sira mós tenke sai vítima uituan hanesan ho povu sira kondisaun dadaun ne’e, kondisaun ki’ak no mukit nia laran”, tenik Nia. 

Akademista ne’e dehan, deputadu/a sira mos tenki hela iha uma rasik, tanba se lae ho uma luxo, kareta di’ak, hetok sira (deputadu/a) halo ‘an liu-tan. Ivo