KSDS Konkorda Estensaun Estadu Emerjénsia
Naunil Media (Díli), Tersa (01/09) ne’e, rezultadu reuniaun Konsellu Superior Defeza no Seguransa (KSDS) konkorda atu estende tan Estadu Emerjénsia bazeia ba pedidu husi Governu konstitusionál da-ualu ba renovasaun ba periodu Estadu Emerjénsia.
“Konsellu Superior Defeza no Seguransa konkorda ona halo estensaun Estadu Emerjénsia. Ohin dader Konsellu Superior Defeza no Seguransa rekomenda ba Prezidente Repúblika (PR), Francisco Guterres ‘Lú Olo’ atu hato’o pedidu Governu nian ba Parlamentu Nasionál hodi deskute depois aprova” informa Xefe Kaza Sivíl Prezidensia Repúblika, Francisco Maria de Vasconcelos, liu husi konferensia imprensa iha Palásiu Prezidensiál Nicolau Lobato, Bairu Pité.
Xefe Kaza Sivíl Prezidensia Repúblika, Francisco Maria de Vasconcelos, esplika bainhira Parlamentu Nasionál aprova ona pedidu Governu nian mak hafoin Xefe Estadu Lú Olo bele dekreta tuir ninia kompetensia.
“Lalais liu ohin selae aban, Prezidente Repúblika sei enkamina pedidu Governu nian ba Parlamentu Nasionál” tenik Xefe Kaza Sivíl Prezidensia Repúblika, Francisco Maria de Vasconcelos.
Tuir Xefe Kaza Sivíl Prezidensia Repúblika ne’e, pedidu estensaun Estadu Emerjénsia ne’e hanesan aplikasaun ida.
Razaun membru Konsellu Superior Defeza no Seguransa, tanba númeru pozitivu Surtu COVID-19 iha Nasaun viziñu Indonézia kontinua aumenta ba bebeik.
Membru sira ne’ebe hola parte Konsellu Superior Defeza no Seguransa mak hanesan Prezidente Repúblika (PR) Francisco Guterres ‘Lú Olo’, Primeiru Ministru (PM) no Ministru Interior (MI), Taur Matan Ruak, Ministra Negósiu Estranjeira no Kooperasaun (MNEK), Maria Adalzija Magno, Ministru Defeza (MD), Filomeno de Jesus Paixão, Ministru Justisa (MJ), Manuel Cáreceres, Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, Komandante Jerál Polísia Nasionál Timor-Leste (PNTL), Komisáriu Faustino da Costa no Diretór Jerál Servisu Nasionál Intelijensia, Manuel Serrano. Nune’e mos hola parte iha konsellu ne’e, membru sira nomeadu husi Parlamentu Nasionál hanesan Deputadu Adérito Hugo Da Costa, Davíd Dias Ximenes, Abel Pires Da Silva no membru sira nomeadu husi Xefe Estadu Timor-Leste Lú Olo mak José Manuel Fernandes ‘Nakfilak’ no Cristina Da Silva. Pau/Mje9
