Arkebispu Virgílio: Hato’o Parabéns Loron 20 De Maiu 2021 Ba Povu-TL
Naunil Media (Díli), Arkebispu Metropolitanu Dom Virgílio do Carmo da Silva, Hato’o parabéns ba loron 20 de Maiu 2021, Aniversáriu ba Restaurasaun Independensia Repúblika de Demokrátika Timor-Leste (RDTL) ba dala 19, ba povu tomak.
“Dala ida tan povu Timor-Leste povu aswa’in, povu fiar nain, komemorasaun Aniversáriu ba Restaurasaun Independensia Repúblika de Demokrátika Timor-Leste (RDTL) ba dala 19, ha’u nian parabáns ba povu doben”, Hateten Arkebispu Metropolitanu Dom Virgílio do Carmo da Silva ba jornalista sira iha nia rezidensia Lesidere, kuarta (19/05).
Arkebispu ne’e hatutan, loron ida foti matan hateke ba leten agradese ba Nai Maromak, ne’ebé nunka abandona povu ida ne’e, iha nia istória no luta ba libertasaun, atu hateke ba kotuk agradese ba Timor oan hotu-hotu ne’ebé kontribui ona ba Timor nia ukun rasik aan, ba sira ne’ebé mate ne’ebé nia naran to’o oras ne’e la tama ona lista no la temi ona, atu Nai Maromak haraik ba sira rahun di’ak lalehan.
“Komemora loron Restaurasaun Independensia ba dala 19 iha situasaun difisil, konvida povu asuwa’in no fiar nain hotu-hotu atu kaer Liman hamutuk husu ba ita nia aan. “saida mak ita tenke halo atu ita sai husi susar ida ne’e”, Tenik Dom Virgílio.
Nia dehan, laos hein deit saida mak Governu halo mai ha’u, maibé saida mak ha’u nuudar Timor oan tenke kontribui duni ba rai ida ne’e mak di’ak, liu-liu iha situasaun Covid-19 nian ne’e
Lider igreja katólika Dom Virgílio do Carmo da Silva hateten maske hasoru situasaun difisil, maibé nafatin unidade no karidade ba malu.
“Liu tiha akontesementu 4 de Abril 2021 Timor oan rasik, husi rai laran no mos rai liur ne’ebé la sente hakmatek wainhira haree nia maluk Timor ona ne’ebé iha susar laran situasaun obriga Timor oan barak la tauk atu hakat ba sentru Akollementu sira nune’e mós la moe atu lolo liman, fó tulun maluk sira ne’ebé iha susar laran, maske tulun kiik oan maibé hatudu nia solidaredade nu’udar Timoroan, hamtuk mak ita bele halo diferernsa ida, ba jestu ne’e ha’u nia parabéns”, Katak Arkebispu Díli Dom Virgílio do Carmo da Silva. Ipe
