Komunidade Kairui Manatutu Konsume Bee Mota, Husu Governu Hadia Kanalizasaun
Naunil Media (Manatutu), Relasiona ho akontesomentu inundasaun ne’ebé akontese iha loron 04 fulan Abril foin lalais ne’e, tuir xefí aldeia Hatu-Karau, suku Kairui, postu Laleia, munisípiu Manatutu Lopes Fatima Ximenes, Hateten husi inundasaun estraga bee bomba ne’ebé komunidade sira uza ba nesesidade loron loron nian, no agora asesu bee mós iha mota laran de’it, tan ne’e husu governo atu hadia tanba la iha dalan ba sira atu hadia bee ne’e.
“Husi inundasaun ne’e estraga mós komunidade sira nia bee bomba ne’ebé sira asesu ba nesesidade lor-loron, agora asesu bee mós iha mota laran de’it, no ami iha ne’e husu ba governu atu hadia bee refere tanba laiha dalan seluk hodi hadia maibé so governu de’it mak bele haree ba iha problema refere” Dehan Xefe aldeia Hatu-Karau ba jornalista Naunil Media iha Hatu-Karau, suku Kairui, postu Laleia, munisípiu Manatutu, kuarta (02/06).
Nia mós informa atu hadia fali bee ne’e sira garantia ba governu tanba orsamentu bo’ot sira la iha dalan atu hadia.
”Hanesan atu troka bomba bee mós ne’e garantia ba governu tanba orsamentu bo’ot ne’ebé, nu’udar autoridade ami nia dalan unika mak halai ba governu dalan seluk ami mesak labele” infoma nia.
Iha sorin seluk xefí suku Cairui Roberto Ximenes, ba Institutu Gestaun Ekipamentus (IGE) husu sira nia prezensa ba komunidade Kairui tanba durante fulan ida ona komunidade sira ba asesu bee moos ho distansia dok no uza de’it bee mota. Aby
