Horta-Taur Ko’alia Dezastre Naturais Ne’ebé Akontese Iha Munisípiu 4
Naunil Media (Díli), Prezidente Repúblika (PR) José Manuel Ramos Horta ho Primeiru Ministru (PM) Taur Matan Ruak ko’alia dezastre naturais ne’ebé akontese iha Munisípiu haat (4), iha ne’ebé populasaun besik atus sia mak afetadu ba inundasaun foin lalais ne’e.
Kestaun ne’e hato’o husi Xefe Governu ba jornalista sira hafoin remata enkontru semanal ho Xefe Estadu iha palásiu Prezidensiál Nicolau Lobato Bairru Pite, kinta (07/07).
“Ohin enkontru semanal ho Prezidente Repúblika iha assuntu rua mak ko’alia ho sua excelensia Prezidente Repúblika, ida mak dezastre naturais ne’ebé hanesan ita bo’ot sira hatene iha Lospalos, Viqueque, Same no Suai ne’ebé afeta ita nia populasaun besik atus hitu too atus sia ita kontinua levantamentu para haree dalan saida mak ita bele apoia sira”, dehan Xefe Guvernu
PM hatutan dadur provizoriu ne’ebé iha mak populasaun besik atus sia mak afeta ba inundasaun no uma kain tolu-nolu resin mak evakua provizoriumente nune’e too oras ne’e dadaun seidauk iha dadus final kona-ba inundasaun ne’e rasik.
“Dadus provizoriu ita iha atus hitu too atus sia i familia tolu-nolu resin mak dadaun ne’e evakua maibé ne’e provizoriu de’it ita seidauk iha dadus final, Sekretariu Estadu sai hela no iha Munisípiu sira mós sai para halo levantamentu para haree loloos ita nia populasaun hira mak afetadu para depois ita mobiliza rekursu para apoiu sira”, katak PM.
Taur hateten, Iha dalan rua para atu apoiu ba populasaun sira ne’ebé afeta ba inundasaun ne’e, hanesan ema hotu hatene katak ida mak apoiu familia vitima sira, no ida seluk mak apoiu ba iha oinsá mak halo reparasaun ba danus fiziku sira hanesan estrada sira ne’ebé aat.
Iha enkontru ne’e Primeiru Ministru mós ko’alia ho Prezidente Repúblika kona-bá atividade governu nian no inklui inisiativa Xefe Estadu nian ne’ebé iha Sabadu loron 9 sei ba halo dialogu ho komunidade iha Ermera kona-bá kafé, tanba ne’e PM mós promete hamutuk ho Ministru balun sei partisipa para ko’alia ho komunidade depois rona mós komunidade sira nia Preokupasaun.*Jos
