PR “Lú Olo”: Valoriza Feto Timoroan Nu’udar Parseiru Luta Nain

Naunil Media (Díli), Prezidenti Repúblika (PR) Francisco Guterres “Lú Olo”, Hateten valoriza feto timoroan nu’udar Parseiru luta nain no fiar metin feto nia potensialidade hodi luta hamutuk.

“Bainhira ita valoriza feto timoroan nu’udar parseiru luta-nain, ita hasae mós fiar metin  ba sira nia potensialidades atu kontinua luta hamutuk ho ita ba libertasaun Povu”.Dehan prezidenti Repúblika (PR) Francisco Guterres “Lú Olo” hato’o liu husi diskursu ba lansanmentu livru Buibere Hamri’ik Ukun rasik An iha Palásiu Prezidenti Nicolau Lobato Bairru Pite kinta, kinta (10/06).

Xefe estadu hatutan, hakarak ka lakohi ohin loron populasaun feto Timor-Leste, kuaze metade populasaun Timor-Leste, Nunee feto sira sai forsa bo’ot ida ne’ébé labele hasees. Ho deit feto sira-nia partisipasaun tomak mak bele hetan susesu iha prosesu dezenvolvimentu ba hamenus kiak iha Rai doben.

Aman ba nasaun ne’e hateten presiza haree feto sira no fó balansu ba feto sira no feto mak hanesan airin forte iha família.

“Ita presiza haree ba feto sira nu’udar inan, riin forte ne’ebé fó balansu ba ita ida-idak, no tanen família ida-idak atu sai forte no saudável babeibeik. Inan hatene hakiak no fahe domin! Hatene hametin laran-hakmatek no responsabilidade  ba sira-nia oan, ho nune’e ita bele sustenta páz no estabilidade iha ita-nia Rai doben” Dehan nia.

Prezidente Repúblika mós hein katak livru ne’e sei loke hotu-hotu  nia neon atu  hasae as feto sira, iha aspetu hoto-hotu.  Sira prova ona katak sira mós halao  knaar susesu iha frente luta hotu-hotu.

PR “Lú Olo” rekomenda, hein katak livru ne’e sei hetan espasu espesiál iha biblioteka nasionál, Arkivu Nasionál, Muzeu Rezisténsia, Konsellu Kombatentes Libertasaun Nasionál, CHEGA no biblioteka instituisaun públika sira-nian no sei tama mós nu’udar material estudu, iha eskola hotu-hotu no Universidade sira. 

Nia afirma enkuantu kuda interese nafatin atu haree ba pasadu nu’udar fonte inspirasaun ba ohin loron no aban bairua, bele hametin ba bei beik orgullu pertense ba Rai  doben ida ne’e,  ho Povu ida ho identidade no istória ho karaterístika rasik no úniku.

Nu’udar atu rekoñesimentu no valorizasaun ba esforsu  halibur testemuñu liu atus ualo iha Timor-Leste tomak no prodús duni  obra koletiva ida,  Prezidenti Repúblika deside fó sertifikadu louvor koletivu ida ba Comissão de Pesquisa e Elaboração da História da Luta da Mulher Timor, Nia hakotu. *Jos