Komisariu Faustino: Vasina Dala Rua, Loron 14 Mak Bele Livre
Naunil Media (Díli), Komandante Jerál Polísia Nasionál Timor-Leste (PNTL) Komisariu Faustino da Costa, Informa sidadaun ne’ebé mak simu ona Vasina dala rua, maibé to’o loron sanulu resin haat (14) mak la’o livre.
“Bainhira ita simu Vasina dala rua ona ita livre ona, lae tenke haree livre ida hanesan ne’ebé? maskara uza nafatin, fase liman nafatin, maibé liu loron 14 mak ita bele la’o sai livre”, Dehan Komandante Jerál Polísia Nasionál Timor-Leste PNTL Komisariu Faustino da Costa ba Jornalista sira hafoin enkontru semanal ho Prezidenti Repúblika (PR) Francisco Guterres “Lú Olo” iha palásiu PrezidentI Nicolau Lobato Bairru Pite, kinta (17/06).
Komisariu Faustino hatutan, dala ruma sidadaun no ema balun intrepreta sala katak sidadaun ne’ebé simu ona vasinasaun kompleta ona dala rua ne’e la’o ba ne’ebé tuir nia hakarak ne’e lae.
“Agora ida ne’e mak dala ruma ema intrepreta sala dehan katak tanba ha’u komandante horseik ha’u simu vasina dala rua, ha’u kompleta entaun ha’u ba iha ne’ebé ne’e tuir ha’u nia hakarak mós, entaun situasaun ne’e parte ida”. Katak nia.
Nia dehan, hafoin konfinamentu domisiliariu jerál horseik sai maibé polísia Nasionál Timor-Leste hala’o implementasaun ba rezolusaun ne’ebé mak iha.
“Agora ita bele dehan horikalan oras 00:00 ne’e sai mas ita bo’ot sira haree didi’ak took rezolusaun hirak ne’e 76,77,78 to’o 90 ne’e dehan halo nusa, ne’ebé PNTL sei haree ida ne’e mak implementa nia implementasaun ne’e la’o duni ho rezolusaun ne’ebé mak iha”, Tenik nia
Nia dehan, la’ós katak membru intrepreta buat ne’e sala lae, agora presiza haree didi’ak iha situasaun ida ne’e PNTL ne’ebé koloka iha postu sira ne’e kumpri orden, karik iha postu sira ne’e sidadaun tama saida mak PNTL serbisu iha ne’ebá ne’e sei halo.
Ikus nia dehan sira iha preparasaun ida atu hato’o hela ba iha governu, dala ruma deklarasaun nai ulun sira nian depois balun foti buat ne’e sai situasaun maibé komesa haree ne’e lá’os hanesan ne’e.
Nune’e mós iha loron 16 fulan Juñu Governu liu husi reuniaun Konsellu Ministru ne’ebé halao iha salaun auditorium Ministériu Finansas deside ona katak sidadaun ne’ebé vasina dala rua ona bele halo movimentu iha teritoriu laran, la presiza tan karta autorizasaun husi Sentru Integradu Jestaun Krize.*jos
