CREMARA SALON Apoia Nesesidade Bázika Ba Kbi’it Laek “Francisco ho Maria” Iha Aidak Behare-Camea
Naunil Media (Díli), Segunda (19 Julho) ne’e, na’in ba CREMARA SALON, Marianita Madalena S. Cardoso, ho inisiativa lori apoia nesesidade bázika ba família kbi’it laek Francisco de Araújo da Silva ho Maria Anita nu’udar fen-laen ho kondisaun defisensia mak hela iha aldeia Aidak Behare, suku Camea no postu administrative Cristo Rei.
Nesesidade bázika sira mak hanesan Fos saka hat, Mina litru lima masa rua, Super-Mie kaisa rua, Rinso Daya no lata Sardina kaisa ida.
Nain ba CREMARA SALON, Marianita Madalena S. Cardoso ka familiar bolu “Mana Mada”, hola asaun solidariedade refere, hafoin lee notisia husi Naunil Media mak publika iha dia 26 fulan Maiu tinan ne’e, kona-ba kondisaun moris real família Francisco (47) no Maria Anita (38).
Hafoin entrega nesesidade bázika, Nain ba CREMARA SALON, Mana Mada, hateten apoia refere mai husi fuan (sentimentu) ne’ebé klean no domin, tuir kbi’it, liu-liu iha situasaun susar pandemia COVID-19.
“Hau fó apoiu ki’ik-oan ida ne’e, hau la’os atu buka naran, maibe nu’udar Humanu, hau hakarak espresa sentimentu solidáriu ba maluk sira ne’ebe presija tulun. Hakarak duni atu ajuda tuir hau nia-forsa, hau laiha interese seluk husi asaun ida ne’e, nein polítika no seluk-tan”, tenik Mada.
Defisensia Francisco, agradese ba apoiu no sei ajuda orasaun ba CREMARA SALON, Mana Mada atu susesu liu-tan iha futuru.
“Ami hanesan kbi’it laiha duni, Hau mos matan aat, loron kalan mak hanesan ne’e hela de’it. Ohin loron alin, oan sira lori sasan mai, Hau sei labele selu imi nia-favór, maibé karik MAROMAK mak bele selu”, dehan defisensia matan ne’e.
Relasiona ho públikasaun notisia ho titulu “Defisensia Francisco Ho Maria Hamonu Mata-Ween Bainhira Haree Realidade Moris”, antes ne’e mos Grupu lubuk ida hanesan AHDMTL, Partido KHONTO, Grupu Santa Bakita Becora fó ona apoiu ba família refere. Ivo
