KM Aprova Alterasaun Dekretu Lei Hodi Permite Realizasaun Atividade Hotu
Naunil Media (Díli), Governu liu-husi Konsellu Ministru (KM) ekstraordináriu aprova ona alterasaun dahuluk ba dekretu lei nú.21/2021, 27 de Agostu kona-ba ba medida ezekusaun deklarasaun ba estadu emerjénsia nian, atu permite atividade relijiozu, sosiál no kultura sira hala’o fali.
“Ho alterasaun ida ne’e permite fila-fali realizasuan eventu relijioza, sosiál, kulturál no desportu sira, maibé tenke kumpri medida sira prevensaun no kontrola Covid-19 nian”, dehan Ministru Prezidénsial Konsellu Ministrus, Fidelis Manuel Leite Magalhães, iha Palásiu Governo, kinta (09/09).
Ministru hatutan, Atividade hotu bele realiza, maibé tenke kumpri medida prevensaun ne’ebé maka iha, atu nune’e bele prevene moras covid-19.
“Iha regra sira ne’ebé maka aplika iha alterasaun dekretu lei ne’e, tenke mantein distansia sosiál sira, uza máskra, taka inus no ibun, inklui fase liman bei-beik no bainhira hakarak tama iha instalasaun husi utilizasaun koletiva sira no la promove formasaun halibur malu ema barak.
Iha realizasaun funébre sira tenke adota medida hirak ne’ebé prevene transmisaun vírus SARS COV-2 nian, maibé ne’e sei permite prezensa iha serimónia funébre sira husi ema na’in-10 ba leten, maibé tenke kumpri protokolu saúde nian no kumpri medida prevensaun no kontrola Covid-19 nian. Estadu emerjénsia ne’e sei abranje territóriu tomak vigora to’o 23:59 loron 29 fulan-Setembru tinan 2021”, Fidelis esplika.
Ministru Prezidénsial Konsellu Ministrus informa, Organizador sira husi eventu sira ne’e, tenke informa forsa seguransa sira kona-ba ninia realizasaun, Fiskalizasaun husi kumprimentu regra husi diploma ida ne’e nian, kompete ba forsa seguransa sira. Ana
