Lere Latolera Militár Estraga Sasán Estadu
Naunil Media (Dili), , Xefe Estadu Maior Generál das Falintil Forsa Defeza Timor-Leste (F-FDTL) Tenente General Lere Anan Timur hateten, estraga sasán estadu krime, tanba ne’e labele Tolera.
“Militár agora duru se maka estraga estadu nia sasán ha’u konsidera hanesan krime, pora o estraga kareta ida tan de’it o lanu, tanba de’it o nia hahalok aat estraga kareta ida ne’ebé ke folin 30 mill 40 mill ida ne’e, ita atu tolera de’it, ne’e labele tolera”, dehan Tenente Jeneral Lere Anan Timur ba Jornalista hafoin remata hasoru malu ho Prezidente Repúblika (PR), Francisco Guterres “Lú-Olo” iha palásiu Prezidente Nicolau Lobato Bairru Pite Kuarta, (06/10).
Tenente Jenerál hatutan, kareta sira ne’ebé durante hetan asidente sei iha prosesu nia laran, tanba nu’udar komandante konsidera ne’e krime
“Kona-ba dezastre kareta sira-nian ne’e prosesu la’o, ha’u dehan ema ne’ebé ke pur ignoransia pur neglizensia, tanba ninia beik halo estadu ninia sasán aat ne’e ha’u nu’udar komandante ha’u konsidera ne’e krime ne’e la’os indisciplina, krime i prosesu kriminal ba nia, ema ne’ebé estraga estadu nia sasán bele sai ida ne’e la aplika de’it, purkeba militár de’it maibé bele aplika mós ba Governu sira”,Tenente Jeneral realsa.
Nia akresenta, prosesu asidente sira ne’e sei la’o tantu iha Ainaro, nune’e iha Liquica foin dadauk ne’e, ida seluk Icom no asidente Becora prosesu sei la’o hela.
Antes ne’e akontese kareta husi membru Falintil-Forsa Defeza Timor Leste (F-FDTL) ida hetan asidente tráfiku iha área Becora, Postu Administrativu Cristo Rei, Munisipiu Dili, rezulta membru F-FDTL ida hetan kanek.
Depois akontesementu Xefe Estadu Maijor Falintil- Forsa Defeza Timor-Leste (F-FDTL) Brigadeiru Jenerál Calisto Santos Coliati hateten, asidente ne’ebé akontese membru F-FDTL ida konduz kareta soke iha áreadores Becora sei entrega ba iha Polisia Militar (PM), hodi halo identifikasaun.*Jos
