BTL,EP Sei Halo Jestaun Di’ak ba Bee-Moos iha Sidade Díli
Naunil Media (Díli), Prezidente Konsellu Administrasaun Bee Timor-Leste, Empreza Públiku (BTL,EP), Carlos Peloi informa, BTL,EP sei halo jestaun di’ak ba kanalizasaun bee-moos iha kapital Díli.
“kanu bee-moos iha kapital Díli ne’e iha sistema lubuk ida iha tempu Portugues no Indonezia nian, bainhira iha tempu ukun rasik an instala tan kanu lubuk ida, defaktu kanu barak demais, dala ruma Bee Timor-Leste labele halo jestaun ho di’ak, dau-daun ne’e BTL komesa halo melloramentu kanu sira husi fatin ida ba fatin seluk iha kapital Díli”, dehan Carlos Peloi ba jornalista sira iha edifísiu BTL, EP Kaikoli, kinta (17/02).
Prezidente BTL,EP ne’e hateten sei buka parseiru dezenvolvimentu hodi bele finansia ba reabilitasaun bee-moos iha sidade Díli.
“Maibé sei iha hela prosesu negosiasaun ho ita nia parseiru dezenvolvimentu sira, liu liu banku para ita bele asegura orsamentu finansiamentu ba reabilitasaun bee-moos iha kapital Díli”, katak nia. Ana
