Lere: FRETILIN Klamar Ho Isin, Ra’an Suli Iha Isin Lolon

Naunil Media (Dili), Kandidatu Prezidente Republika periodu tinan 2022-2027 ho numeru sorteiu 8 ne’ebe hala’o komisiu politiku iha Postu Administrativu Cristu Rei, Tenente Jeneral reformaduy Lere Anan Timur, hatete, hau FRETILIN klamar ho isin, FRETILIN nia raan suli iha hau isin lolon.

Lere Anan Timur, kasu Lia hirak nee iha nia kampanha ba dala 15 ne’ebe hala’o iha kampu futebol Portu Taibessi, Postu Administrativu Cristo Rei, Dili, Tersa,  (15/03/).

Lere dehan, wainhira nia desidi atu avansa hodi kadidata aan ba Prezidente Republika ba periodu tinan 2022-2027, hakarak kandidata liu husi FRETILIN, maibe FRETILIN neebe regula husi Mari Alkatiri taka dala ba nia kandidatura hodi re-kandidatu Lú Olo.

“ Hau nunka hanoin atu kandidatu independente, tanba hau FRETILIN neebe hau rasik maka fakar hau nia raan, hau tenki kandidatu husi FRETILIN, maibe hau nia maun Mari, Sekretariu Jeral Partidu FRETILIN taka dalan mai hau hodi re-kandidatura irmão Lú Olo,” haktuir Lere.

Lere hatutan, Mari uza ninia poder hodi rekandidatu Lú Olo sem liu husi kongresu FRETILIN.

“Mari Uza ninia poder nudar Sekretariu Jeral konvoka enkontru ho CPN, desidi hau nia irmão Lú Olo kandidatu husi FRETILIN, lolos kongresu maka desidi,” Tenik nia.

Kandidatu ho numeru sorteiu 8 ne’e afirma, ohin loron maun Lú Olo tau bandeira FRETILIN iha nia sorin,  “Lere” mate ga moris FRETILIN nia uza deit boinha mean.

Lere akresenta, wainhira nia hetan fiar husi povu hodi sai prezidente, nia sei siak ba ema, baruk ten, koruptor sira no oportunista sira.

“Ema rihun ba rihun mate, faluk oan kiak sira ohin loron halerik, ita lakohi hakiak naok ten iha Timor, ita lakohi hakiak ema foti aan iha Timor, Timor ukun aan ita lakohi ema baruk ten iha Timor, tenki servisu atu lori ita nasaun ba oin,” tenik Lere.

Aleinde nee mos Lere kontinua hatoo ba nia apoiantes sira katak, iha loron eleisaun mai keta haluha atu vota ba numeru 8, nunee wainhira nia eleitu nia sei halo diferensa ho lider sira seluk neebe hetan ona konfiansa husi povu.

Entretantu, reprezentante ekipa susesu kandidatura ho numeru Sorteiu 8 husi Munisipiu Dili, Bernadinu de Cristo Pereira “Teki Timur” hatete, ba maluk sira neebe mai iha fatin ida nee, ita hotu tenki hamutuk hodi vota ba numeru 8 hodi lori ita nia aman Lere Anan Timur ba Prezidente Republika periodu tinan 2022-2027.

Ohin hau ho ita boot sira hamutuk iha nee, ita hotu sei hili numeru 8, numeru 8 nee maka Lere, Lere maka FRETILIN, Lere Estrutura FRETILIN, laos direitamenta ba estrutura, maibe Lere Anan Timur ho kompaneiru sira hotu husi baze maka sae ba leten, laos husi leten maka tun mai baze,” dehan Teki Timur.

Ba apoiantes Lere nia Teki Timur katak, se mak ohin marka prezensa iha fatin nee hakarak ga lakohi tenki lori Lere ba Prezidente Republika.

“Kamaradas sira ita ohin iha nee hakarak ka lakohi lori ita nia kandidatura ba Prezidente Republika,” hatete nia.

Antes atu remata Teki Timur husu ba apoiantes sira wainhira too tempu eleisaun keta haluha vota ba numeru 8, hodi marka diferensa ho lider sira seluk. Latu