Lori Sasan Tama Ilegal iha Fronteira, PNTL Kaptura Na’in 3
Naunil Media (Díli), Komandante Jerál Polísia Nasionál Timor-Leste (PNTL) Komisariu Faustino da Costa hateten hahu husi loron 1 to’o 22 Marsu tinan 2022 Polísia Nasionál Timor-Leste Kaptura Sidadaun na’in tolu (3) iha fronteira, tanba lori sasán ilegal tama Timor-Leste.
“Maibé atu dehan katak iha loron 1 mai to’o iha loron 22 Marsu ne’e, ita mós halo kapturasaun ba ema na’in tolu ne’ebé lori sasán ilegal tama Timor-Leste hanesan ha’u dehan tiha ona iha tempu balun liu ba”, dehan Komisariu Faustino da Costa ba jornalista sira hafoin enkontru semanal ho Prezidente Repúblika (PR) Francisco Guterres “Lú Olo” iha Palásiu Prezidensiál Nicolau Lobato Bairru Pite, kinta (24/03).
Komisariu Faustino da Costa hatutan, Sasán hirak ne’ebé sidadaun sira lori tama mai TL ne’e tau ba osan karik hamutuk 20.000, nia folin hanesan mós sasan kiik sira ne’ebé hatama mina konvustibel ho buat kiik oan sira seluk ne’ebé tuir lei karantina, buat sira ne’e tenke hatama mas prosesu nafatin la’o ho formasaun entidades relevante ho autoridade fronteira ninian.
KOMJER hateten, Maske Polísia Nasionál Timor-Leste foku ba atividade kampaña ba eleisaun prezidensiál ninian, maibé PNTL asegura nafatin fronteira no halo formasaun ho entidades hotu, ho fasilitasaun ne’ebé ho lei husi Ministeriu Negósiu Estranjeiru no konsuladu Kupang, depois organiza enkontru mós ho autoridade seguransa Indonézia nian, ne’ebé PNTL sei kontinua bainhira hakat ba iha eleisaun Prezidensiál segunda ronda ninian. *Jos
